Bul týraly «Nur Otan» partıasy Tóraǵasynyń Birinshi orynbasary «Aıqyn», «Lıter» gazetteriniń Astanadaǵy jańa redaksıasyna barǵan kezde aıtty.
Osyǵan deıin Almatydan shyǵyp kelgen atalǵan eki basylym osy aptada Astanaǵa kóship keldi. Soǵan oraı búgin Máýlen Áshimbaev redaksıalarǵa arnaıy baryp, gazetterdiń ujymymen jáne basshylyǵymen kezdesti. Kezdesýde ol búginde partıalyq aqparat quraldarynyń aldynda kontentti jańǵyrtý, materıaldardyń jazylý stıli men jetkizý formalaryn ózgertý sıaqty jańa mindetter turǵanyn aıtty. Sondaı-aq basylymdardyń Astanaǵa kóshýi partıalyq jańǵyrýdyń bir kórinisi ekenin de tilge tıek etti.
– Qazir Astanada saıası, ǵylymı jáne zıaly orta qalyptasty deýge tolyq negiz bar. Munda elimizdiń bolashaǵyn aıqyndaıtyn úlken jınalystar, iri is-sharalar, túrli halyqaralyq basqosýlar ótedi. Gazetterimizdiń negizgi baǵyty Elbasy saıasaty men tapsyrmalarynyń oryndalýy, Úkimettiń, Parlamenttiń atqaryp jatqan jumystary ekeni belgili. Sondyqtan basylymnyń ortalyqqa kóshýi óte oryndy. Bul eki gazet partıanyń basylymy bolǵandyqtan, olardyń Ortalyq apparatta ornalasýynyń ózi Elbasy saıasatyn nasıhattaý úshin de jaqsy bastama. Sondyqtan bul sheshimdi partıalyq jańǵyrý jolyndaǵy sımvolıkalyq qadam dep qabyldaýǵa bolady, – dedi Máýlen Áshimbaev.
Atalǵan basylymdardyń redaksıalary Qonaev kóshesindegi «Nur Otan» partıasy Ortalyq apparatynyń ǵımaratynda ornalasqan. Munda ujymnyń shyǵarmashylyqpen aınalysýy úshin barlyq jaǵdaı jasalǵan. Sondyqtan endi gazetterdiń mazmuny men formatyn da jańǵyrtý kerektigin aıtqan Máýlen Áshimbaev: «Osy jolda Elbasy tapsyrmalarynyń oryndalýyn qatań qadaǵalap, keıbir óńirlerdegi olqylyqtardy gazet betterinde batyl jarıalaýymyz qajet, – dedi.
Odan bólek, partıa Tóraǵasynyń Birinshi orynbasary eki redaksıanyń qyzmetkerlerine áleýmettik máselelerdi ońtaıly sheshý úshin partıa tarapynan qoldaý kórsetiletinin de jetkizdi. Iaǵnı aldaǵy aıdan bastap qyzmetkerlerdiń aılyǵy 20 paıyzǵa kóbeımek. Budan basqa, olardyń memlekettik baǵdarlamalar boıynsha jeńildikpen páter alýyna da partıa qol ushyn sozatyn bolady.
