Bir kem dúnıe... Búgin Almaty kúńirenip tur. Sebebi ońtústik astana halyq adamy, ǵasyr adamy, jazýshy Sherhan Murtazany aqtyq saparǵa shyǵaryp saldy. Qoshtasý rásimi Muhtar Áýezov atyndaǵy memlekettik akademıalyq drama teatrynda ótti, dep habarlaıdy Qamshy.kz aqparat agenttigi.

Qoshtasý rásimine jazýshynyń jaqyn týystary men áriptes-dostary jınaldy. Sheraǵamen aralasqan áriptes dostary, shákirtteri bastap, bılik ókilderine deıin boı kórsetti. Egilip jylap turǵan Ulyqbek Esdáýletti kórdim, ustazynan aıyrylǵanyna kúńirengen Nurlan Orazalındi kórdim, basyn bir kótermeı, tek tómen qarap Sheraǵany shyǵaryp salǵan Asanáli Áshimov te bar.

Jasy Sherhan Murtazadan úlken bolsa da, halyq jazýshysyn tik turyp shyǵaryp salǵan Ábdijámil Nurpeıisovti atap ótpeske bolmas. Qolyndaǵy taıaǵy, dir-dir etip turǵan aıaǵyna qaramastan kishige degen izettiligin, uly tulǵaǵa degen qurmetin, marqumǵa degen syılastyǵyn kórsetip, bos turǵan oryndyqqa rásimniń sońyna deıin otyrmady.

Tirisinde qaraılaspaǵan bılik ókilderi de qazaǵa jınaldy. QR Mádenıet jáne sport mınıstri Arystanbek Muhamedıuly, Almaty qalasynyń ákimi Baýyrjan Baıbek, Jambyl oblysynyń ákimi Asqar Myrzahmetov, Energetıka mınıstri Qanat Bozymbaev, májilis depýtaty Saýytbek Ábdirahmanovtar bar. Al memleket basshysy Nursultan Nazarbaev Sheraǵamen qoshtasýǵa kele almady, tek qoshtasý haty oqyldy.

Sherhan Murtazamen áriptes bolyp aralasqan aqyn-jazýshylarymyz marqummen estelikterimen bólisse, jas býyn qazaq ádebıeti men jýrnalısıkasynda óshpes iz qaldyrǵan jazýshyǵa zor alǵystaryn jaýdyrdy.

«Búgin biz ǵasyr adamy – Sherhan Murtazany aqtyq saparǵa shyǵaryp salý úshin jınaldyq. Ol qazaqstandyq jýrnalısıkada óshpes izin qaldyrdy. Tipti qazaqstandyq basylymdardyń bárin derlik basqardy. Parlament depýtaty boldy, memlekettiń qoǵamdyq ómirine aralasty, halyq úshin jumys istedi. Biz ór tulǵany umytpaımyz», - dedi Baýyrjan Baıbek.

Akademık Orazaly Sábden halyqtyń qamy úshin ter tógip, shyndyq úshin kúresken Sheraǵasyn aıtyp tebirendi. Ári sońǵy kúnderinde jazýshynyń jaǵdaıyn jasap, qamqor bolǵan uly men qyzyna alǵys bildirdi.

«Sherhan Murtaza týraly kóp aıtylady, aıtamyz da. Ol uly Abaıda keıin qazaqtyń únin úndep, joǵyn joqtaǵan adam. Ol tirisinde ne aıtpady, ne jazbady? Munyń bári halyqqa málim. Joǵarǵy keńestiń depýtaty til máselesine oraı «Jylan da ǵana qos til bolady» degen. Jer máselesine kelgende «Jer anany satpaımyz, eshkimge bermeımiz» dep kesip aıtqan. Boıyndaǵy tektiligin joǵaltpaǵan alyp tulǵa edi. Sonysy bizge úlgi bolý kerek», - dedi Orazaly Sábden.

Aqyn, dramatýrg Nurlan Orazalın Sherhan Murtazany «qazaqty oıatqan alashtyń arystany» dep baǵalady. Álıhan, Ahmetterden keıingi qarapaıym halyqtyń múddesine jumys istegen Sheraǵany aıtqanda, kóńili tolqyp sala berdi.

«Adam balasy myna ómirge belgili bir mindetti atqarý úshin keledi. Dál osy turǵyda Sheraǵam ulttyń aldyndaǵy mindetti atqarý úshin ıyǵyna túsken júkti kótergen alashtyń arystany», - dedi Nurlan Orazalın.

Iá, búgin aza tutqan qazaq eli ardaqtysyn, aıaýlysyn, uly perzentin qımaı qara jerge tapsyrdy. Kúńirengen Almaty... Bir kem dúnıe...

Aıta keteıik, jazýshy Sherhan Murtaza qazannyń 9-y kúni 86 jasynda dúnıeden ótti. Ol 1932 jyly Jambyl oblysyna qarasty Jýaly aýdanynda dúnıege kelgen. 1955 jyly Máskeýdegi Lomonosov ýnıversıtetiniń jýrnalısıka fakúltetin támamdaǵan. "Lenınshil jas", "Sosıalısik Qazaqstan" gazetteriniń redaktory, Qazaqstan memlekettik teleradıo kompanıasynyń tóraǵasy qyzmetterin atqarǵan. Qazaqstannyń joǵarǵy keńesinde, keıin parlament májilisinde depýtat bolǵan. Jazýshy "Qyzyl jebe", "Tamuq", "Aı men Aısha", "Qara marjan", "Belgisiz soldattyń balasv", "Myltyqsyz maıdan", "Stalınge hat", "Beseýdiń haty" tárizdi birneshe roman-povestjazǵan. Odan bólek aýdarmalary bar.

Máselen, Sherhan Murtaza shyǵarmashylyq jolyn stýdent kezinde Lagınniń “Hottabych qart”, Kárimniń “Bizdiń úıdiń qýanyshy” shyǵarmalaryn qazaq tiline aýdarýmen bastady. Sonymen qatar Andersenniń áńgimelerin, vengr halyq ertegilerin, Sh.Aıtmatovtyń “Botagóz”, “Qosh bol, Gúlsary”, “Teńiz jaǵalap júgirgen tarǵyl tóbet” povesterin, “Borandy beket”, “Janpıda” romandaryn qazaq tiline aýdardy. Eki tomdyq shyǵarmalar jınaǵy jaryq kórdi. Shyńǵys Aıtmatovtyń týyndylaryn qazaq tiline aýdardy.