Búgin Májiliste «Nur Otan» partıasy fraksıasynyń kezekti otyrysy ótti, dep habarlaıdy Qamshy.kz aqparat agenttigi.
Otyrys barysynda QR prezıdenti Nursultan Nazarbaevtyń negizgi tapsyrmalary, fraksıanyń III sesıasynyń qorytyndysy talqylandy.
Otyrys Parlament Májilisi tóraǵasynyń orynbasary men «Nur Otan» partıasy fraksıasynyń basshysy Gúlmıra Isimbaevanyń bastamasymen ótti.
Fraksıa basshysy Gúlmıra Isimbaeva óz sózinde altynshy shaqyrylymdaǵy depýtattyq korpýstyń atqarǵan jumysyn Nursultan Nazarbaev joǵary baǵalaǵanyn aıtty. Sonymen qatar Májilis Parlamentiniń tóraǵasy Nurlan Nyǵmatýllın Palatanyń birinshi plenarlyq otyrysy barysynda IV sesıanyń ashylýynda Memleket basshysynyń tapsyrmalaryna saı oryndalýy shart barlyq jumystardy naqty atap shyqty.
Sonymen qatar, fraksıa basshysy depýtattardyń aldyndaǵy mindetterin Nursultan Nazarbaevtyń bes áleýmettik bastamasy ári Joldaýymen baılanystyrdy.
«Biz, «Nur Otan» partıasy Fraksıasynyń músheleri partıa tóraǵasynyń barlyq tapsyrmalaryn jaýapkershilikpen oryndaýǵa tıispiz. Sebebi tapsyrmalardyń bári derlik eldiń áleýmettik-ekonomıkalyq áleýetin damytýǵa negizdelgen. Árıne, azamattardyń da ál aýqaty baqylaýda bolady», - dedi vıse-spıker Gúlmıra Isimbaeva.
Fraksıa basqarma tóraǵasynyń birinshi orynbasary Bazarbaev fraksıa jumysynyń III sesıasynyń qorytyndysy men mańyzdy mindetteri ári fraksıa músheleriniń IV sesıadaǵy mindetterin baıandady.
Óz baıandamasynda «Nur Otan» partıasy tóraǵasy tapsyrmalary ári partıanyń saılaý aldy «Qazaqstan – 2021: Tutastyq. Turaqtylyq. Jasampazdyq» baǵdarlamasy aıasynda jasalǵan jumystarymen tanystyrdy.
Fraksıaǵa múshe depýtattar da baıandamalarymen tanystyrdy. Sabılánov, Omarov, Mamraev, Amanjolova, Ospanov zańnama máselelerindegi memleket basshysynyń tapsyrmalary aıasynda oryndalǵan mindetterin oqydy.
Otyrys qorytyndysynda tórtinshi sesıaǵa naqty josparlar jasaldy.
Aıta keteıik, otyrysqa «Nur Otan» partıasynyń hatshysy Qýanǵanov, QR Parlament Májilisiniń depýtattary – fraksıa músheleri, Qazaqstan halqy Assambleıasynyń depýtattary qatysty.
Buǵan deıin Elbasy «Nur Otan» partıasy saıası keńesiniń keńeıtilgen otyrysyna qatysyp, partıany júıeli túrde jaǵyrtý kerektigin aıtqan. Ári Elbasynyń áleýmettik bastamasyn júzege asyrýǵa kirisý kerektigi aıtyldy.
«Partıa kún tártibindegi jalpyulttyq deńgeıdegi jumystarǵa belsendi aralasyp, modernızasıa zamanyndaǵy qozǵalysy jyldam kúshke aınalýy tıis. Sonymen qatar tek partıanyń emes, memleket boıynsha kadrlyq rezervtiń jumysyn retke keltirý kerek. Osyǵan sáıkes, basty nazar sanda emes, sapada bolady», - dedi Nursultan Nazarbaev.
Óz kezeginde «Nur Otan» partıasy tóraǵasynyń birinshi orynbasary Máýlen Áshimbaev Elbasynyń sózin qoldap, partıanyń aldyndaǵy mindetterdi eskerip ótti.
«Memleket basshysynyń saıasaty arqasynda elimiz táýelsizdik jyldarynda mol tabystarǵa qol jetkizip keledi. Búgingi kúni Nursultan Ábishuly Nazarbaev elimizdi aldyna úshinshi jańǵyrýda júzege asyrý maqsatyn qoıyp otyr. Osyǵan baılanysty Qazaqstannyń jańǵyrýyna júıeli qatysatyn strategıalyq kúsh bolyp qalyptasý – partıanyń basty mindeti», - degen edi Áshimbaev.
