Búgingi tańda elimizdegi e-kommersıany ilgeriletý maqsatynda kóptegen is-sharalar júzege asyp jatyr. Solardyń biri – elektrondy saýda qatysýshylaryna arnalǵan tólem júıesi. Barshamyz biletindeı, bul júıe ınternet-saýdadaǵy negizgi elementterdiń biri. Osy rette, elektrondy saýda sýbektileri úshin qolma-qol aqshasyz tólemniń quraly retinde «salynbaly tólemdi» taný boıynsha túsindirý jumystary júrgizilýde.
Otandyq BAQ taratqan málimet boıynsha qazirgi tańda «QR-nyń keıbir zańnamalyq aktilerine saýda qyzmetin retteý máseleleri boıynsha ózgerister men tolyqtyrýlar engizý týraly» zańy jobasynyń tujyrymdamasy ázirlendi. Osyǵan sáıkes, elektrondy saýdany odan ári damytý máseleleri rettelmek.
«Jalpy, elektrondy saýda salasyndaǵy memlekettik baǵdarlamalar men is-sharalardy iske asyrý bastalǵannan beri naryqtyń damýynda oń úrdis baıqalady. Osy oń ózgeristerdi ári qaraı jalǵastyrý maqsatynda elektrondy saýdany damytýda qoldanystaǵy tásilderdi qaıta qaraý jumystary bastalyp ketti», – delingen Ulttyq ekonomıka mınıstrliginiń bergen málimetinde.
Bul maqsatta álemdik tájirıbe zerttelgen. Halyqaralyq tájirıbe kórsetkendeı, elektrondy saýda alańdaryn damytý elektrondy komersıany damytýda oń úrdisti kórsetken. Bul óz kezeginde elektrondy saýda sýbektilerine saıt qurýdy, qolma-qol aqshasyz tólemder júıesin engizýdi, jetkizý qyzmetterinde jáne t.b. únemdeýge múmkindik bermek.
Ulttyq ekonomıka mınıstrliginiń málimetinshe, elimizdegi onlaın naryqty damytý úshin «Qazposhta» AQ Almaty jáne Astana qalalarynda Fýlfılment ortalyqtaryn salý boıynsha jobalaryn iske qosty (qattaý, saqtaý, suryptaý, qaptaý, tasymaldaý). Mundaı ortalyqtar taýar jetkizý ýaqytyn edáýir qysqartýǵa, tasymaldaý shyǵyndaryn azaıtýǵa jáne jeke kýrerlik poshtalardy qalyptastyrýǵa yqpal etpek. Buǵan qosa, ınternet-dúkender jáne elektrondy alańdarmen logıstıkalyq úrdisterdiń aýtsorsıngin qalyptastyrýǵa jaǵdaı jasaıdy.
Taǵy da aıta ketetin jaıt, 2018 jyldyń 1-shi qańtarynda Qazaqstanda elektrondy saýda qyzmetkerleri tabys salyǵynan bosatylǵan bolatyn. Iaǵnı, elektrondy saýda salasynyń korporatıvtik jáne jeke tabys salyǵynan alynatyn salyqtan 0 paıyzǵa deıin bosatýdyń belgilengen tártibine sáıkes salyqtyq jeńildikter kúshine endi. Bul ereje 2023 jyldyń 1 qańtaryna deıin júzege asyrylady.
