Kórgennen kózaqy almaı bıznesimiz dóńgelenbeıdi dep oılaıtyn kafe, meıramhana, toıhana qojaıyndary keıingi kezde er azamat daıashylaryn, aljapqysh bolsa meıli ǵoı, shotland kıltimen (ıýbkasymen) orap tastaıtyn bolǵan. Sózden jeńilgen beıpil aýyz qatyndar «erkek bolmasań ıýbka kıip al!» dep ashýǵa minýshi edi, daıashylardyń ıýbka kıetindeı ne jazyǵynyń bar ekenin túsinbedik. Negizi, er azamattyń ıýbka kıýi bizde namys bolyp kóringenimen, bul shotlandyqtardyń ulttyq kıimi. Degenmen, ózge eldiń ulttyq atrıbýtyn butymyzǵa japsyrǵannan ne utyp jatqanymyz uǵynyqsyz. 
Chehıa, Avstrıa, Fransıa, Túrkıa sıaqty damyǵan elderde áıel zatyn, onyń ishinde qyz balasyn daıashylyqqa jolatpaıdy. Bul kásippen kóbine jasy 50-den asyp, aqyl toqtatqan er azamattar aınalysady. Erkek-garsondar taǵam mázirin áıelderge qaraǵanda sabyrmen, salmaqpen, uǵynyqtylaý jetkizedi degen dástúr bar. Al bizde tún jarymyna deıin syra tasyp, araq quıyp júrgen órimdeı jas qyzdardy kóresiń. Ashshy sýǵa sylqıa toıyp alyp, beıádep qylyqtarymen eldiń berekesin qashyryp jatqan atpaldaı azamattardyń, bir jutym urttap alsa, saıqal kúlki qysatyn masań áıelderdiń bylapyt sózderin osy qyzdar kún saıyn estýge májbúr. «Zalaldy» jumystan alatyn táýlikaqysy da mardymsyz. 1000-1500 teńge! «Mundaı abyroısyz jumysqa qolymyzǵa tıetin azyn-aýlaq shákirtaqymyzǵa qosymsha nápaqa bolyp qala ma dep májbúrlikten jegilemiz», deıdi ózderin kolejdiń stýdentterimiz dep tanystyrǵan órimdeı boıjetkender. Keıde masaırap, qarq-qarq kúlki qysqan jigitterdiń tezdetip tapsyrys berýdiń ornyna júziktiń kózinen ótkendeı jap-jas qyzdardyń aty-jónderin surap, jeti atasyn túgendep, ýaqyt ótkizip, kelemej etip otyrǵandaryn da baıqaısyń. Ony aıtasyz, daıashylyqqa qyzmetke alý úshin qysqa ıýbka kıýin talap etetin «kastıngshil» meıramhanalar da bar kórinedi. Shetelde daıashyny tańdaý basqasha júredi: shet tilin meńgerýine, mádenıeti men etıketine, meıramhana mázirin, ásirese, taǵam ıngradıentterin, ár taǵamnyń ázirlený tehnologıasyn jatqa bilýine aıryqsha nazar aýdarylady.
Qysqasy, «qyzǵa qyryq úıden tyıý» bolyp turǵanymen, tún jarymyna deıin kalán men temeki tútinine tunshyǵyp, qolańsy ıisten bastary aınalyp júrgen qarakóz qaryndastarymyzdy daıashylyqtan tyıa almaı otyrmyz...
Siz qalaısyz, qyzyńyz úıde me, álde tabys tabam dep kafe jaǵalap júr me?

Bekjigit Serdáli