Reseıdiń Sankt-Peterbýrg qalasynda mentaldy arıfmetıka boıynsha álemdik rekord jańardy. 150 bala estafetalyq ádispen 30 myń esepti 26 mınýt, 26 sekýnd, 12 mıllısekýndta shyǵardy. 120 memleketten jınalǵan balalardyń qatarynda aqtaýlyq Oryngúl Arystan da bar. Bul - alǵyr oqýshynyń bul alǵashqy jetistigi emes.
Rekord 20 qyrkúıek kúni Sankt-Peterbýrg qalasyndaǵy İİ Eýrazıalyq halyqaralyq áıelder forýmy aıasynda ornatylǵan. Álemdik jáne Azıa Rekord kitabynyń ókilderi tapsyrmany qyzdarǵa synaq retinde uıymdastyrǵan. Bul – tarıhta alǵash ret oryn alǵan álemdik rekord. Balalardyń barlyǵyna forýmǵa qatysqany úshin, Rekord ornatqany úshin dıplomdar jáne Reseıdegi Qazaqstan elshisiniń Alǵys haty tabystalǵan.
Oryngúl Aqtaýdaǵy №17 mekteptiń 6 synybynda oqıdy. Oqý ozaty mentaldy arıfmetıkaǵa 4 synyptan beri qatysady. 2017 jyly jeltoqsan aıynda Malaızıada ótken mentaldy arıfmetıka olımpıadasynda bas júlde ıelengen. 3 myń balanyń ishinen sýyrylyp shyqqan esepke júırik qyz týǵan kúninde ózine úlken syı jasaǵan.
-Jarysta kishkene qobaljý boldy, óıtkeni qatysýshylar óte kóp jáne birinen-biri myqty. Bárimizge bir ǵana qalam berip, ýaqytty eseptep turdy. Biz bir tapsyrmany kezek-kezek oryndadyq. Sonda mentaldy arıfmetıka boıynsha rekord jańarttyq, — deıdi Oryngúl.
Oryngúl «UCMAS» halyqaralyq ıntellektýaldyq damý akademıasynyń Aktaýdaǵy fılıalynda oqyp júr. Qazir tórtinshi deńgeıge jetken.
-Oryngúl alǵash úıirmege kelgende topta odan ózge 5-6 bala boldy. Jalpy balalar mentaldy arıfmetıkaǵa qyzyǵyp bastaǵanymen, aıaǵyna deıin jetkize almaı, shydamaı jatady. Al Oryngúl yntasymen, talabymen birden kózge tústi. Kez kelgen salany úıirip alyp ketedi, qatysatyn úıirmesi kóptigi sonsha, bos ýaqyty joq, — deıdi mentaldy arıfmetıkadan dáris beretin muǵalimi Qarlyǵash Abdreımova.
Oryngúl matematıkamen qosa qazaq tili, dene shynyqtyrý, tehnologıa jáne mýzyka pánderin súıip oqıdy. Esep shyǵarýdan bólek sýret salyp, bı bıleıdi. Aǵylshyn tilin de meńgerip júr. Bolashaqta dáriger bolýdy armandaıdy.
Ol eki tańbaly sandardy birden qosyp, olardy bir tańbaly sandarǵa jyldam kóbeıte alady. 8 mınýtta 180 esepke deıin shyǵara alady.
Mentaldy arıfmetıka olımpıadasy Malaızıa elinde bıyl da ótedi. Oryngúl taǵy da baǵyn synap kórgisi keletinin jetkizdi.
