Dúısenbide, ıakı qazannyń 22-i kúni Esentaı Molldyń tórinde Asqar Uzabaevtyń rejıserligimen túsirilgen «Mahabbat kafesi» kınosynyń tusaýkeseri boldy. Kileń yǵaı menen syǵaı jınalǵan jıynǵa kásibimizdiń qudyrettiliginiń arqasynda biz de qatystyq. Osy jolǵy pres-kórsetilimniń ereksheligi, Almatynyń ákimi Baýyrjan Baıbektiń ózi boı kórsetti. Bul qyzyqtyń basy dep bilińiz. Sebebi, Baıbektiń ákesi, Elbasynyń súıikti synyptasy Qydyrǵalı myrza da «Mahabbat kafesin» tamashalaýǵa kelip, balasynyń sol jaǵyna jaıǵasty. Taǵdyrdyń mańdaıǵa jazýymen týra ákimniń artqy jaǵynan oryn alyppyz. Al, Baýyrjan Baıbektiń oń jaǵynda kim otyrdy deısiz? Jaýaby – Erke Esmahan. Sebebi «Mahabbat kafesinde» basty róldi somdaıtyn da osy otandyq dıva. Rejıser Asqar Uzabaevtyń aıtýynsha, bul kıno romantıkalyq komedıa bolǵanymen, onda romantıkalyq jeli basym. Alaıda ne mahabbatty, ne komedıany kóre almaǵandyqtan ba, áleýmettik jelide jazylyp, aıtylyp jatqan odalarǵa reaksıa ma, «Erke Esmahan – jaqsy ánshi, biraq shyndyq qymbattyraq» prınsıpiniń áseri me, qolǵa qalam alýǵa májbúr boldym. Erke Esmahannyń «juldyzyn» odan saıyn jarqyratý úshin túsirilgen týyndynyń kórsetilimi barysynda ornymnan turyp ketpeı, aıaǵyna deıin kórýime sebepker bolǵan – Qydyrǵalı Muqametámiruly Baıbek. Ákimniń 78 jasqa kelgen ákesi aqyryna deıin shydap otyrǵanda meniń turyp ketýim ersi kóriner degen qazaqy tárbıeniń arqasynda 90 mınýt (shamamen alynǵan - red.) áreń ótti.
Mahabbat kafesi Erke Esmahannyń aktrısa retindegi alǵashqy kınosy bolsa, rejıser Asqar Uzabaevtyń, qatelespesem, jıyrmasynshy kınosy. «Aýyl degen taqyrypty jaqsy kóremin. Sebebi naǵyz romantıka – aýylda», – dep sóz sóılegen Uzabaev osy joly aýyldyń bet-beınesin, ondaǵy qarapaıym qazaqtyń tirligin jáne áreketin jıirkenishti túrde bergendeı. Qolynan burqyraǵan temekisin tastamaıtyn, áldebir erkekti (kúıeýin emes) zaryǵa kútip júrgen áıel, samsany jep otyryp ishteri aýyrǵandary sonshalyq, quıryqtarynan b...q shyǵa jazdaǵan, sóıtip ájethanaǵa zyr júgirgen bandıtsymaqtar, muzdatqyshtaǵy sý erip ketkennen tokqa túsip, 220 vólttiń áserinen shaptyryp dáret syndyrǵan áke, kınonyń sońynda sezim bildirip, o bastan qyzǵa qyryndamaǵan jigit jáne sýdan taza, sútten aq qyz jaıly kıno. Keıipkerlerdiń tulǵalyq bolmysy, bir-birine sezimi ashylmaǵan kınoda etıkaǵa saı kelmeıtin biraz kadrlar bar. Ashyq súıisý nemese tósektegi sena bolmasa da mundaı kadrdan óz-ózińnen uıalady ekensiń. Bastapqyda «kıno festıvál janrynda túsirilgen eken-aý» dep qylań bergen úmit te atalmysh kadrlardan keıin birden sóndi. Asqar Uzabaevtyń oryssha sóılegenine qarap-aq qazaqtyń janyn uqpaıtynyn boljaı alamyz. Alaıda qazaqtyń qarapaıym qyzy, aýyldan shyqqan qarakózimiz Erke nege kınonyń ádepten ozǵanyn baıqaı otyryp, úndemeı qaldy eken. Qomaqty qarajat jumsalǵan kınonyń lokasıasy da «ýaý» emes. «Oıdaǵydaı kafe tabý úshin Shýǵa arnaıy attandyq» degen rejıserdiń sózine qarap, kafeniń ereksheligine biraz bas qatyrdym. Poezd stansasyna jaqyndyǵy bolmasa, kádimgi kafe. Almatynyń shet jaǵasynan «Mahabbat kafesin» tabý qıynǵa soqpaıdy-aý. Aıtpaqshy, jarnamalyq plakattarda «Kafesi Mahabbat» dep jazylǵan kıno ataýy «boıaýshy-boıaýshy degenge saqalyn boıaptynyń» keri boldy. Sebebi, mundaı qasıetti qazirgi zaman tilimen «haıp» dep ataıdy. «Gákkýdiń» jýrnalıseri «Haıp hanshaıymy» dep ataq bergen Erke Esmahannyń qazaq tiline jetik ekenin de, prodúser, jýrnalıs, Erke Esmahannyń «ápkesi» Gúlnur Mamasarıpovanyń da sózge sheshen ekenin jaqsy bilemiz.
18 kún boıy túsirilgen «Kafesi Mahabbat» kınosynan uqqanymyz, qazaq kórermeni surǵylt, ábirjigen kınolardy mise tutatyn ýaqytty áldeqashan artqa qaldyrdy. Qazirgi kórermen boıaýy qanyq, senarıi ish pystyrarlyq emes, jas akterlerdiń talantyna kýá bolýǵa múmkindik beretin fılmderdi kórýge asyq. «Bizdiń bir-birimizge degen tartylysymyz bar» dep óz kınosynyń Tóreǵalıdiń «Uly dala komedıasymen» tuspa-tus kelýine baılanysty ázildegen Erke Esmahan alaıda Tóreǵalıdiń asyǵy alshysynan túskenin moıyndaýy qajet. «Men mahabbatymdy kınoda ǵana emes, ómirde de izdeımin» dep jýrnalıserdiń suraǵyna jaýap bergen Erke Esmahannyń aktrısa retindegi alǵashqy qadamy sátsiz bolsa da, jar izdeýde sáttiligi serik bolsyn deımiz.
