Asa iri kólemde para aldy degen Mádenıet mınıstrliginiń qyzmetkeri úıqamaqqa alyndy dep jazady Qamshy.kz aqparat agenttigi KTK telearnasynyń deregine súıenip.
Osyǵan deıin Mádenıet jáne sport mınıstrliginiń birneshe laýazymdy qyzmetkeri para aldy degen kúdikpen ustalǵan bolatyn. Olardyń arasynda mınıstrliktiń ákimshilik departamentiniń dırektory Erenaı Dárjibaev qana úıqamaqqa alynǵan. Alaıda 46 jastaǵy sheneýniktiń parany kimnen, ne úshin jáne qansha kólemde alǵany ázirshe jarıalanbaı otyr.
♦ Mádenıet jáne sport mınıstrligi: Tergeý isi bitpeı mınıstrliktiń qyzmetkerin aıyptaı almaımyz
Bir anyǵy, Erenaı Dárjibaev parany Astanadaǵy qymbat meıramhanalardyń birinde alǵan. Keıbir derek kózderiniń habarlaýynsha, aýyzbastyryqtyń kólemi 14 mıllıon teńge. Alaıda, Jemqorlyqqa qarsy ulttyq búro bul málimetti rastaǵan da, teriske shyǵarǵan da joq. Al basty kúdikti Dárjibaev Mádenıet jáne sport mınıstrliginde ákimshilik departamentin basqaryp qana qoımaı Etıka jónindegi ýákil qyzmetin de qosa atqarǵan. Iaǵnı vedomstvo qyzmetkerleriniń jemqorlyqqa jolamaýyn qadaǵalapty. Endi ózi shatylyp jatqan laýazymdy sheneýnik 24 jeltoqsanǵa deıin úıqamaqta otyrady.
