22 qazanda bastalǵan festıváldiń gala – konsertin 2000-ǵa jýyq qala turǵyndary men qonaqtary tamashalady, dep habarlaıdy Atyraý oblysynyń Óńirlik komýnıkasıalar qyzmeti.
Qyrǵyzstan, Ózbekstan jáne Reseı men qatar, elimizdiń ózge de oblystarynan 600-den asa óner ıelerinen quralǵan 15 orkestr qatysty. 
Úsh kúnge sozylǵan halyqaralyq festıvál «Rýhanı jańǵyrý» baǵdarlamasy aıasynda ótti. Gala-konsertke qazaq óneriniń xas dúldúlderi Asanáli Áshimov, Ulyqbek Esdáýlet, Qatımolla Berdiǵalıev, Júrsin Erman, Aıtqalı Jaıymov, Aıgúl Úlkenbaevalar qatysty. Oblys ákimi Nurlan Noǵaev barlyq qonaqtarǵa qosh keldińiz aıtyp, alǵysyn bildirdi.
-Atyraý aspanyn, Aqjaıyqtyń jaǵasyn kúı kúmbirletken Qurmanǵazy babamyz atyndaǵy xalyqaralyq orkestrler festıváline kelgen barlyq qonaqtarǵa atyraýlyqtar atynan rızashylyǵymdy bildiremin. Elbasy óziniń baǵdarlamalyq maqalasynda "Árkim óziniń týǵan jerin, ólkesin jetik bilýi kerek. Týǵan jerden elge degen maxabat oıanady, elge qyzmet etý namysy oıanady" degen bolatyn. Ár úıdiń tórinde turatyn dombyranyń arqasynda elimizdiń óneri, dástúri, mádenıeti búginge deıin jetip otyr. Ónerimiz berik kezde mádenıetimizdi, dástúrimizdi tanı bilip, dáriptep, álemdik jahandaný zamanyndaǵy jastarymyzdyń boıyna rýx sińire otyryp, elin, jerin, qorǵaıtyn azamatty ósirýde sizderdiń atqaryp júrgen eńbekterińiz zor. Óz ónerlerińizge adaldyq tanytyp kelesizder, qatarlaryńyz kóbeısin. Biz ózimizge júktelgen laýazymdyq mindetke sáıkes osy sharalardy uıymdastyramyz. Sonymen qatar, ár adam óziniń azamattyq ustanymyna sáıkes bul isterdiń qosshysy, jarshysy bolýy lázim,-dedi oblys ákimi.
Sharanyń basty maqsaty – uly kúıshi jáne kompozıtor Qurmanǵazy Saǵyrbaıulynyń rýhyn nasıhattaý. Atyraý oblysy ákiminiń tapsyrmasymen oblystyq mádenıet, muraǵattar jáne qujattama basqarmasy uıymdastyrǵan aıtýly shara kóptiń kóńilinen shyqty. 
-Barlyǵy joǵarǵy deńgeıde ótti. Biz qalaǵa kelgennen bastap kútip alyp,jaqsy uıymdastyryp qoıǵan. Festıváldiń ótý barysy da utymdy qarastyrylǵan, bir-birine dostyǵy men jarasymy saqtalǵan memleketterdi jınaǵan. Alǵash ret ulttyq halyqaralyq festıválge qatysyp otyrǵanymyzdyń ózi biz úshin úlken mártebe. Qazaq aspaptarynyń ózindik erekshe úni bar. Dombyrany tyńdaǵanda erekshe kúıde bolasyń. Alaıda, tek aspaptar men tembrimizde ózgeshelik bolmasa, mýzykada janymyz bir,- deıdi Reseıdiń halyq ártisi Aleksandr Mostykanov.

Shara sońynda oblys ákimi elimizge tanymal belgili dırıjerlardy "Festıvál laýreaty" ataǵymen marapattady.