Aqtóbede jalpy qalalyq senbilikterdi ótkizý jalǵasýda. Qalanyń turǵyndary, memlekettik qyzmetshiler, kásiporyndar men uıymdardyń qyzmetkerleri kúrekterin qolǵa alyp, oblys ortalyǵynda 10 myńnan astam aǵash otyrǵyzdy.

Bul sharadan oblystyń basshylyǵy da qalys qalmady. Oblys ákimi Berdibek Saparbaev «Dostyq» saıabaǵynyń kógaldandyrý jumysyna qatysty. Búgingi kúni onyń aýmaǵynda Qytaıdan, Túrkıadan, Germanıadan, Slovakıadan, Reseıden jáne basqa elderden kelgen 50 sheteldik kompanıalardyń ujymdary 1000-nan astam kóshet otyrǵyzý jumystaryn júrgizýde.

«Kún ótken saıyn Aqtóbe ádemilenip keledi. Memleket basshysynyń tapsyrmasyna sáıkes, ekologıany jaqsartý jáne qalany kógaldandyrý máselelerine erekshe kóńil bólinip, Aqtóbe turǵyndarynyń bos ýaqytyn ótkizý úshin qolaıly jaǵdaılar jasalýda. Tek sońǵy úsh jylda Aqtóbede 48 jańa saıabaq jáne alańdar ashyldy», - dedi oblys ákimi.

Ol sondaı-aq azamattardy oblys ortalyǵyn abattandyrýǵa jáne kógaldandyrýǵa belsene qatysýǵa shaqyrdy.

Senbilikke 8 myńnan astam adam men 100 tehnıka jumyldyryldy, saıabaqtar, alańdar men kósheler 1,3 mln. sharshy metr aýmaq tazartyldy. Qoqys alańyna 70 tonna qoqys aparyldy. 10 myń kóshet (tal, qaraǵaı, aqqaıyń, terek, alma) jáne 500 buta otyrǵyzyldy.

Tabıǵat jáne tabıǵat resýrstaryn paıdalaný basqarmasynyń málimetinshe osy jyldyń kúzinde Aqtóbe oblysynda 40 myńnan astam aǵash otyrǵyzylady.