Aqtóbe oblysynda 15 662 gektar sýarmaly jer qalpyna keltiriledi. Bul úshin respýblıkadan 7 mlr 200 mln teńge aqsha bólingen. Joba Eýropalyq qaıta qurý jáne damý bankinen qaryz tartý arqyly qarjylandyrylmaq.

Óńirde sýarmaly jerlerdi ulǵaıtý jumystary qarqyndy júrip jatyr. Bıyldan bastap 15 662 gektar sýarmaly jer qalpyna keltiriledi. Qazir 5 merdiger kompanıa 15 sý nysanynda jumys jasap jatyr.Bul joba 5 aýdanda júzege asyrylyp jatyr. Sondaı-aq Aqtóbe oblysynda sýarmaly alqaptardyń aýmaǵyn ulǵaıtý úshin 10 jańa sý qoımasy salynady.

-Bıyl oblysta 21,5 myń gektar sýarmaly jerge dándi daqyl egildi. Al kelesi jyly qoldanystaǵy sýarmaly jer 8,9 myń gektarǵa ulǵaıtý josparlanyp otyr. Osylaısha 2021 jylǵa sýarmaly jer alqabyn 40 myń ga jetkizý josparlanyp otyr. Budan ózge óńirde jańadan 10 sý qoımasy salynady. Bul taǵy 30 myń gektardan astam jerdi sýarýǵa múmkindik beredi. Sharýa qojalyqtary egin salý kezinde jańa tehnologıalardy paıdalanady. Sáıkesinshe , alatyn ónim de mol bolady. Qazir “kartoptyń 1 gektarynan 250 sentner ónim aldyq” dep maqtanyshpen aıtady. Bul nátıje emes. Ótken jyly “Aktep” kompanıasy Qarǵalyda “Bıznestiń jol kartasy” baǵdarlamasy boıynsha 640 gektar jerge egin ekti. Bıyl ár gektarynan 400 sentnerden ónim aldy. Iaǵnı , sýarmaly jerlerdiń paıdasy óte kóp, -deıdi “Qazsýshar” RMK Aqtóbe bólimshesiniń dırektory Bekzat Námetov.

Buǵan qosa “Sazdy”, “Aqtóbe” jáne “Qarǵaly” sý qoımalaryn qaıta jańǵyrtyp, syıymdylyǵyn arttyrý jumystary júrip jatyr.

* Sýarmaly jerlerdi qalpyna keltirý jumystary 5 aýdanda júrgiziledi. Máselen, qala mańyndaǵy Blagodar, Sazdy, Qýraıly eldi mekenderinde 2000 gektardan astam jer turaqty sýarý júıesine qosylady. Bul jumystar Hromtaý, Qarǵaly, Alǵa men Oıyl aýdandaryndja da júrip jatyr. Al Sazdy ózenin Aqtóbe sý qoımasymen jalǵastyratyn sý jelisiniń qurylysy oblys ortalyǵyndaǵy jasyl jelekterdi kútý úshin paıdalanylmaq. Bul maqsatqa 1 mlrd 361 mln teńge qarastyrylǵan,-deıdi Bekzat Námetov.

Jalpy óńirde 3 iri sý qoımasy men 140-tan astam toǵan bar. Qazir kóbiniń pasporty daıyndalyp, túgendeý jumystary júrgizilip jatyr. Mamandardyń paıymdaýynsha, sýarmaly jerlerdi aınalymǵa engizý aýyl sharýashylyǵyndaǵy eńbek ónimdiliginiń arttyrady. Sondaı-aq aımaqtaǵy 8 myńǵa jýyq adamdy jumyspen qamtamasyz etýge jaǵdaı jasamaq.