Oblys ákimi Berdibek Saparbaev 24 qazan kúni jumys babymen Muǵaljar aýdanynda bolyp, memlekettik baǵdarlamalardyń júzege asyrylýymen tanysty jáne birneshe áleýmettik nysandardyń ashylýyna qatysty.

Qandyaǵash qalasynda Berdibek Saparbaev memlekettik-jekemenshik áriptestik aıasynda salynǵan 170 oryndyq balabaqshanyń saltanatty ashylýyna qatysty. Mektepke deıingi mekeme ǵımaratynyń jalpy alańy myń sharshy metr. Joba quny - 60 mln teńge. «Baqytty bala» balabaqshasy barlyq qajetti jabdyqtarmen jaraqtanǵan, balalardyń jeke, shyǵarmashylyq qabiletin damytý úshin jaǵdaı jasalǵan. Materıaldyq-tehnıkalyq bazasymen tanysqan oblys basshysy balabaqshaǵa teledıdar tartý etti.

Aıta keteıik, jyl basynan beri oblysta 3700 orynǵa 37 jańa mektepke deıingi mekeme ashylǵan. Oblystyń barlyq aýdandaryndaǵy 3-6 jas aralyǵyndaǵy balalar mektepke deıingi bilimmen 100% qamtylǵan.

Osy kúni Qandyaǵashta sondaı-aq, alpys páterli besqabatty turǵyn úı de paıdalanýǵa berildi. Bul kúni kópbalaly otbasylar, jetim balalar, múgedekter men búdjet salasynyń qyzmetkerleri qonys toıyn toılady.

- Árbir adam úshin óziniń baspanasy bolǵany mańyzdy. Sondyqtan, Táýelsizdik alǵan kúnnen bastap Prezıdent halyqtyń ál-aýqatyn kóterýge, sonyń ishinde árbir qazaqstandyqty turǵyn úımen qamtamasyz etýge basa nazar aýdaryp keledi. Sol úshin kóptegen memlekettik baǵdarlamalar qabyldanyp jatyr. Máselen, búginde «Nurly jer», «7-20-25» baǵdarlamalary tıimdi júzege asyrylýda. Tek Qandyaǵashtyń ózinde bıyl 240 páter berildi, al jalpy oblysta osy kezeńniń ishinde kem degende 870 myń sharshy metr turǵyn úı salynatyn bolady, - dedi Berdibek Saparbaev quttyqtaý sózinde.

Jańa qonys ıelerine jylýlyq pen otbasy jaılylyǵyn tilegen oblys ákimi Azat Ábıevtiń úıinde qonaqta boldy. Jas jigit jetim bala retinde úı kezeginde turǵan. Búgin onyń armany oryndaldy. Alǵashqy qonaq bolyp kelgen Berdibek Saparbaev páter ıesine tońazytqysh syıǵa tartty.

Óńir basshysy sondaı-aq, bıyl qyrkúıek aıynda paıdalanýǵa berilgen jańa jekemenshik medısına ortalyǵynyń qyzmetimen tanysyp, temirjol vokzalynyń alańynda ornalasqan Analar aleıasynda boldy.

Berdibek Saparbaev «Astana» saıabaǵy men Alpamys batyr eskertkishiniń saltanatty ashylýyna qatysty. Saıabaq aýmaǵynyń alańy – 2,15 gektar. Eskertkishtiń bıiktigi tuǵyrymen eseptegende 12 metrge jýyq.

Uly batyrdyń jaýynger jylqynyń ústinde otyrǵany beınelengen. Monýmenttiń artynda kolonnada ornalasqan. Joba «Týǵan jerge taǵzym» aksıasy aıasynda júzege asyrylǵan.