Jumys sapary kezinde Túrksib aýdanyn aralaǵan Almaty ákimi Baýyrjan Baıbek rekonstrýsıalanǵan «Almaty-1» temirjol vokzalynyń aınalasyn jáne vokzal aldyndaǵy kólik qozǵalysyn uıymdastyrýdyń syzbasyn kórdi.
Vokzaldyń aldyndaǵy jańarǵan alańǵa burynǵy eski asfálttyń ornyna trotýar plıtkasy tóselgen, jasyl jelek aýmaǵy keńeıgen, 40-tan astam aǵash otyrǵyzylǵan. Kishi pishindi arhıtektýralyq formalar qoıylyp, Álibı Jangeldın eskertkishiniń syrty jańarǵan.
Qoǵamdyq qaýipsizdikti arttyrý maqsatynda vıdeobaqylaý kameralary qoıylǵan.
Temirjol vokzalynyń týra aldyna qoǵamdyq kólikke basymdyq beretin qondyrǵylar ornatylǵan, ótpeli joldarda qaýipsizdik qatań sakqtalǵan. Jaqyn arada zamanaýı formattaǵy beket keshenderi ornatylady.
Almaty ákimi Memleket basshysynyń týrızm jáne kólik- logıstıkalyq qyzmet sektoryn damytýǵa aıryqsha nazar aýdaratynyn atap ótti. Bıylǵy jyly qalada «Almaty-1» jáne «Almaty-2» temirjol vokzaldarynyń aınalasy qaıta jańardy, endi biraz jyldardan soń «KTJ» AQ ǵımarattardyń ózderin modernızasıalaıtyn bolady. «Saıran» halyqaralyq avtovokzaly da qatar rekonstrýksıalanýda.
«Memleket basshysynyń Joldaýynda qalalarda turǵyndar úshin qolaıly jaǵdaı jasaý qajettigi atap ótilgen. Biz keler jyly da Almatynyń tarıhı ortalyǵy men ár aýdandy modernızasıalaýdy odan ári jalǵastyramyz. Sońǵy jyldary Túrksib aýdanynda aýlalardyń 50%-dan astamy abattandyryldy. Endigi jyly taǵy 200 aýla jańarady, osylaısha qalamyzdyń qart aýdanynyń barlyq aýlalary qaıta jasalady», - dedi Baýyrjan Baıbek.
Bulardan ózge, keler jyly Túrksib aýdanynda jaıaý júrginshige basymdyq berý úshin Saýranbaev kóshesi modernızasıalanady, eki skver qaıta jasalady. Súıinbaı dańǵylynan Erjanov kóshesine deıingi Sholohov kóshesi jóndeledi, trotýarlar keńeıip, jasyl jelek otyrǵyzylady.
Aıta keterligi, qala keńistigin jaqsartý aıasynda megapolıstiń tarhı ortalyǵynyń úshten ekisi jańardy, 524 kóshe men 1400 eski aýlalar qaıta jasaldy. 300 km aryq, 800 km astam ınjenerlik júıe rekonstrýksıalandy. Qalanyń barlyq jer asty joldary kúrdeli jóndeýlerden ótti.
Kóshedegi barlyq jaryq kózderiniń úshten biri dıodty jáne energıany saqtaıtyn shamdarǵa aýystyryldy. Jyl aıaǵyna deıin jańa qoǵamdyq kóliktiń úlesi 80%-ǵa jetedi.
