Almatyda «Spýtnık» stadıonyn qaıta jasaǵan soń balalardyń «Jas qyran» atty oqý-jattyǵý fýtbol kesheni ashyldy.
Jańarǵan stadıon 800 kórermenge arnalǵan, shatyry kóz tartady, drenajdy júıeli alań, FIFA sertıfıkasıalaǵan sońǵy býyndaǵy jasandy ıtalándyq gazon bar. Ortalyqta 500-den astam jas fýtbolshy jattyǵa alady, munda 50 jattyqtyrýshy jumys isteıdi.
«Men senderdi búgingi qýanyshty merekelerińmen quttyqtaımyn. Osyndaı bastamalarǵa alǵys aıtamyn jáne qoldaý bildiremin. Mundaı oń sharalardyń barlyǵy Memleket basshysynyń sporty damytý jónindegi saıasatynyń arqasynda júzege asýda», - dep atap ótti Qazaqstan fýtbol Federasıasynyń basshysy Ádilbek Jaqsybekov.
Aıta keterligi, jyl basynan beri almatylyq «Meniń aýlamdaǵy sport» jobasy sheńberinde 18 myńnan astam bala sportpen aınalysýda. Jeke sport uıymdaryn tikeleı kompensasıalaý barysynda «Batyl bol» jobasy qolǵa alyndy, munda turmysy tómen otbasylardyń balalary sportqa keńinen tartylýda.
«Prezıdent Qazaqstan halqyna Joldaýynda sportty damytýǵa aıryqsha nazar aýdardy jáne elimizdiń sport ınfraqurylymyn damytýdyń ózekti joldaryn belgilep berdi. Stadıondy qaıtadan kúrdeli jóndeýden ótkizý úshin «Jas Qyran» fýtbol ortalyǵy aýqymdy jumystar atqardy. Ózderińiz bilesizder,Spýtnıktiń úlken tarıhy bar, fýtboldyń otandyq juldyzdarynyń kópshiligi ózderiniń kásibı joldaryn osy jerden bastady. Men keshenniń jas daryndardy tárbıeleý isine tyń serpin beretinine senimdimin» , - dedi Almaty ákimi Baýyrjan Baıbek.
Qala basshysy Almaty velotrekin rekonstrýksıalaýdyń aıaqtalyp qalǵanyn, keler jyldan bastap 5 myń oryndy jeńil atletıka stadıonynyń qurylysy bastalatynyn aıtty.
«Basty maqsat balalardy sportqa keńinen tartý, olardy óz eliniń patrıoty etip tárbıeleý, al fýtbol bizdiń ata-analarymyzǵa qýanysh ákeletin, ár oınalǵan mach oń emosıa beretin bolsyn», - dedi óz kezeginde balalar men jasóspirimderdiń «Jas qyran» qazaqstandyq lıgasynyń prezıdenti Berik Qanıev.
Eske salsaq, Memleket basshysy óz Joldaýynda Úkimet pen ákimdikterdiń nazaryn kem degende 100 deneshynyqtyrý-saýyqtandyrý keshenderin salýǵa aýdardy jáne burynnan bar sport nysandaryn tıimdi paıdalanýdy nusqady.
«Jas Qyran» jańa fýtbol akademıasy 1964 jyly ashylǵan SDÚSHOR №2 bazasy negizinde jumys isteıdi. Buǵan eski «Spýtnık» stadıonyn qaıta jasaý arqyly qoljetti. Keshen Almaty ákimdigi men «Jas qyran» balalar men jasóspirimderdiń fýtbol ortalyǵy» JSHS memlekettik-jeke áriptestik yntymaǵy arqasynda iske qosyldy.
Keshenniń ashylý saltanatyna Qazaqstan Premer-mınıstriniń orynbasary Erbolat Dosaev, elimizdiń mádenıet jáne sport mınıstri Arystanbek Muhamedıuly qatysty.
