Almaty ákimi Baýyrjan Baıbek jumys sapary kezinde qalany abattandyrý boıynsha buryn bergen tapsyrmalarynyń oryndalý barysyn tekserdi.
Megapolıs basshysy buryn Jeltoqsan kóshesin aralaǵan kezde «Táýelsizdik tańy» monýmenti janyna shaǵyn qaýipsizdik aımaǵyn jasaýdy tapsyrǵan edi.
Eger buryn kólik qozǵalysy bóligi eskertkishpen túıisip tursa, endi shaǵyn jerge kespe tas tóselip, qozǵalys qaýipsizdigi qamtamasyz etildi ári jasyl shóp otyrǵyzyldy.
Óz kezeginde Abaı dańǵylynyń birqatar bóligine, sonyń ishinde Lermontov atyndaǵy orys drama teatrynyń aldyna granıtti trotýar plıtkasy tóseldi, jáne jasyl jelek kólemi artty. Teatrǵa kire beris jerdegi uzaq ýaqyt boıyna bos turǵan sý burqaq iske qosyldy.
Qalany modernızasıalaý barysynda Ulttyq kitaphana men Baıseıitova kóshesi arasyndaǵy burynǵy rezervýardyń ornyna jańa fontan paıda boldy.
Kedergisiz keńistikti ulǵaıtý úshin pandýstardyń sany kóbeıdi. Mysaly, Sport pen týrızm akademıasy aldyndaǵy jańa fontanǵa qınalmaı túsýge bolady. Kólik qozǵalysy bóligine jaqyn ornalasqan beketter qaýipsizdik úshin aýystyryldy, jolaýshy aǵyny kóp jerlerge qosymsha beketter jasalady.
Qalany aralaǵan Baýyrjan Baıbek kásipkerlermen júzdesti, qaıta jasalǵan dańǵyldarda ornalasqan saýda obektilerin kórdi.
Abylaı han dańǵylyndaǵy «Lakomka» kondıter dúkeniniń satýshysy jóndeý jumystarynan soń jáne uzaq ýaqyt boıyna bos turǵan fontannyń iske qosylýy barysynda kelýishilerdiń edáýir kóbeıgenin aıtty.
«Satyp alýshylar jıi kele bastady, tipti sender jańadan ashyldyńdar ma dep suraıdy. Al biz munda kópten beri jumys jasaımyz. Aınala taza, bárimiz rızamyz», - dep kúlimsiredi ol.
Bir aı buryn ǵana jańarǵan «Almaty Kitap» dúkeniniń satýshysy Natalá Koh Abaı dańǵylyn rekonstrýksıalaý arqasynda kitapqa degen qyzyǵýshylyqtyń artqanyn jetkizdi.
«Sizder syrtty jańalasańyzdar, biz ishti árleýdemiz. Onyń barlyǵy oń nátıje berýde. Jańarǵan jerlerde serýendeýshiler sany artty, kitap vıtrınasyna kóz salyp, kelýshiler de kóbeıdi», - dedi Natalá Koh.
Aıta keterligi, qazirgi kezde jańarǵan dańǵyldarǵa aǵash otyrǵyzý, zamanaýı kóshe jıhazdaryn qoıý bastaldy. Kóshe men trotýarlardyń jaryq kózderi modernızasıalanýda. Alynǵan baǵanalar qalaǵa qosylǵan eldi mekenderge ornatylýda.
Bulardan ózge, qala keńistigin jaqsartý aıasynda megapolıstiń tarıhı ortalyǵynyń úshten ekisi jańardy, 524 kóshe men 1400 eski aýlalar qaıta jasaldy. 300 km aryq, 800 km astam ınjenerlik júıe rekonstrýksıalandy.
Jyl aıaǵyna deıin qalanyń jaryq kózderiniń úshten biri dıodty jáne energıany jınaqtaýshy shamdarǵa aýystyrylady, jańarǵan qoǵamdyq kóliktiń úlesi 80%-ǵa jetedi.
