Almatyda Birikken Ulttar Uıymy úıiniń tusaýkeseri ótti. Joǵary halyqaralyq standarttarǵa jáne qaýipsizdik talaptaryna saı jasalǵan ofıstiń ashylýyna elshilik korpýstarynyń jáne BUU-nyń 14 óńirlik ofısteriniń ókilderi qatysty.

Megapolıs ákimi Baýyrjan Baıbek Almatynyń turaqty damýdy ustanatynyn atap ótti. «Qala adamdar úshin» konsepsıasy aıasynda qoǵamdyq keńistik modernızasıalanýda, onyń ishinde múmkindigi shekteýli jandarǵa barlyq jaǵdaılar jasalýda. BUU-nyń damý Baǵdarlamasyna saı «Turaqty kólik» jobasy júzege asýda.

«Almatyda 29 konsýldyq pen saýda ókildikteri bar, sonymen qatar iri transulttyq kompanıalardyń 60-tan astam ofısteri ornalasqan. Qazaqstan – beıbitshilikti súıetin ári qaýipsiz el. Memleket basshysynyń ınstıtýsıonaldy reformalarynyń arqasynda turaqty ekonomıkalyq ósim qamtamasyz etilgen. Biz qalany halyqaralyq uıymdardyń óńirlik habyna aınaldyrý úshin júıeli jumystar júrgizýdemiz. Búgin DDU Almaty deklarasıasyna qol qoıylǵanyna 40 jyl tolýyna arnalǵan «Merler samıtiniń» ótýine oraılastyrylǵan BUU-y jańa úıiniń tusaýkeseri bizdiń ortaq yntymaǵymyzdyń tarıhyna altyn áriptermen jazylatynyna senimdimin», - dedi Baýyrjan Baıbek.

Óz kezeginde IýNISEF-tiń Eýropa jáne Orta Azıa elderi boıynsha óńirlik dırektory Afshan Han Almatydaǵy jańa ofıstiń óńirlik ókildikter qyzmetine tyń serpilis beretinin jáne Qazaqstannyń órkendeýine úles qosatynyn, al Qazaqstannyń BBU odan ári damýyna barynsha yqpal etetinin atap ótti.

«BUU Bas hatshysynyń atynan Qazaqstanǵa, syrtqy ister mınıstrligine, qala ákimshiligine osyndaı ıgi sharalardy júzege asyrǵandary jáne barlyq óńirlerde turaqty damýdy maqsat etkenderi úshin alǵys aıtamyn. Bul jańa ofıs halyqaralyq uıymdarmen ǵana emes, sonymen qatar eldiń daryndy jastarymen yntymaqtastyqty odan ári nyǵaıtýǵa jańa múmkindikter beredi», - dep atap ótti Afshan Han.

BUU úıi qalanyń isker aýdanynda, Botanıka baǵy men «Atakent» kórme ortalyǵyna jáne negizgi magıstraldarǵa jaqyn jerge ornalasqan. BBU-nyń ókildigi jańa ofıske bıylǵy jyldyń aıaǵynda kóshedi dep kútilýde.