Almatyda Dúnıejúzilik densaýlyq saqtaý uıymynyń «Salaýatty qalalar» Eýropalyq jelisi qalalary merleriniń samıti jumysyn bastady. 100-den astam ákimshilikterdiń, halyqaralyq uıymdar men medısınalyq qaýymdastyqtyń ókilderi bastapqy medısınalyq-sanıtarlyq kómek kórsetý men densaýlyq saqtaý qyzmetine kópshilikti keńinen tartýdaǵy qalalardyń róli týraly máselelerdi talqylaıdy.
Samıtke qatysýshylardy quttyqtaǵan Almaty ákimi Baýyrjan Baıbek osydan 40 jyl buryn qabyldanǵan Almaty deklarasıasynyń arqasynda bastapqy medısınalyq-sanıtarlyq kómek kórsetý máseleleriniń densaýlyq saqtaý júıesindegi basty býyndardyń birine aınalǵanyn atap ótti.
«Qazirgi kezde bizdiń qalada 650 medısına uıymdary jumys isteıdi, olardyń 70-i keń profıldi emhanalar. Barlyq memlekettik mekemeler sırflyq formatqa kóshken jáne zamanaýı qondyrǵylarmen jabdyqtalǵan. Ekonomıkanyń damýy turmysty túzetti, nátıjesinde Almaty turǵyndarynyń ómir súrý jasy Orta Azıadaǵy eń joǵary kórsetkishke jetti. Búgingi kúni megapolıs «óńirlik magnıtke»aınalǵan, ómir súrý, bıznesti júrgizý, bilim alý úshin óte tartymdy, biraq joǵary mıgrasıalyq qysymǵa da ıe», - dedi Baýyrjan Baıbek.
Mysaly, sarapshylardyń boljamy boıynsha 2035 jylǵa qaraı Almaty turǵyndarynyń sany 3 mln. adamnan asady dep kútilýde. Al bulardyń barlyǵyn sapaly jumys ornymen qamtý qajet, qoǵamdyq kólikti pıdalanatyn jolaýshylar 4 ese, jaıaý júrginshiler men velosıpedshiler 3 ese kóbeıedi eken. Soǵan qaramastan, jeke kólik sany 600 myń bolyp, qazirgi deńgeıinde qalýy tıis.
Jalpy, Almaty «Qala adamdar úshin» prınsıpi boıynsha júıeli túrde modernızasıalanýda.Zalaldy zattar keńistigi tarylýda, qoǵamdyq kólik, zamanaýı veloınfraqurylym jáne basqalary damýda.
Jaqyn arada Almatydaǵy jeke sektor gazben 100% qamtylady. Bıyl ıtalándyq tehnologıa boıynsha qoqys suryptaıtyn keshen jumysyn bastady, ol qoqysty ýtılızasıalaýda qalanyń suranysyn túgel jabady.
«Inovasıalyq ekologıalyq ortany qalyptastyrý, OESR elderi úlgisinde sapaly bilim men densaýlyq saqtaýdy júzege asyrý - bizdiń mańyzdy mindetterimizdiń biri. Osy oraıda sapaly, joǵary damyǵan medısınalyq qyzmet kórsetýdegi ózge qalalardyń tájirıbeleri bizge óte qyzyq. Mundaı kezdesýler tájirıbe almasýǵa jáne jańa ıdálardyń ómirge kelýine yqpal etedi», - dep atap ótti megapolıs ákimi.
Óz kezeginde DDU-y Eýropalyq búrosynyń óńirlik dırektory Jýjanna Iakab alqaly sharanyń qalalardaǵy densaýlyq saqtaý salasyndaǵy qıyndyqtardy joıý joldaryn taqylaıtynyn jáne «Salaýatty qalalar» jelisi qyzmetiniń naqtyly baǵyttaryn anyqtaıtynyn atap ótti.
«Biz samıttiń negizgi baǵytttaryn eskeremiz. Onyń ústine erteń jeli qyzmetiniń júzege asýyna nıet bildirýshi merlerdiń Almaty úndeýi qabyldanady. Bul Astanada qabyldanantyn bastapqy medısınalyq- sanıtarlyq kómek kórsetýdiń jahandyq deklarasıasynyń alǵashqy qadamy bolady. Barlyq kóshbasshylardy jergilikti jáne jahandyq deńgeıde qalalardyń salaýatty bolashaǵyn qamtamasyz etý jolynda saıası kórgendik tanytýǵa shaqyramyn», - dedi J.Iakab.
Eki kún ishinde samıt barysynda tanymal ǵalymdardyń baıandamalary tyńdalady, aktýaldy máseleler boıynsha otyrystar jáne eki jaqty kezdesýler ótedi.
