Almaty ákimi Baýyrjan Baıbek jáne Dúnıejúzilik densaýlyq saqtaý uıymy Eýropalyq búrosynyń dırektory Jýjanna Iakab megapolıste ótip jatqan «Salaýatty qalalar» Eýropalyq jelisi merleriniń samıti aıasynda ózara yntymaqtastyqtyń perspektıvalaryn talqylady.

Áńgime barysynda Jýjanna Iakab DDU-nyń Almatymen, jalpy Qazaqstanmen yntymaqtastyǵy deńgeıin joǵary baǵalady, salaýatty ómirdi qalyptastyrý men densaýlyq saqtaý salasyn modernızasıalaýdyń oń nátıjelerin atap ótti.

«Jaıly qala keńistigin arttyrý, qoǵamdyq kólikti damytý, velosıpedshiler jáne sportshylar úshin qolaıly ınfraqurylymdy qalyptastyrý qala turǵyndarynyń densaýlyǵyn jaqsartady. Júrgizilgen zertteýler kórsetkendeı, qalany durys josparlaý onkologıalyq jáne júrek- qan tamyrlary aýrýlary saldarynan bolatyn ólim deńgeıin orta eseppen 25%-ǵa qysqartady eken. Almatynyń tájirıbesi tek Qazaqstanǵa ǵana emes, Eýropa óńiriniń birqatar qalalaryna da paıdaly», - dep atap ótti DDU-y Eýropalyq búrosynyń dırektory

Ol óziniń sózinde osydan 40 jyl buryn qabyldanǵan Almaty deklarasıasynyń bastapqy medısınalyq-sanıtarlyq kómek kórsetýde qazirdiń ózinde akýtaldy ekenin ári halyqaralyq deńgeıde mańyzdy ról atqaratynyn aıtty. DDU qalamen yntymaqtastyqty keńinen damytýdy josparlaýda jáne qala turǵyndarynyń salaýattylyǵyn jaqsartýdaǵy jumysty odan ári jalǵastyratyn bolady.

«Memleket basshysynyń Joldaýynda elimizdiń odan ári damýyna yqpal etetin qalalardy turaqty óristetýge erekshe mán berilgen. Ja ıly jáne ekologıalyq qala keńistigin,OSER elderindegideı sapaly bilim men densaýlyq saqtaý qyzmetin qalyptastyrý bizdiń basty baǵyttarymyzdyń biri bolyp tabylady. Osy oraıda sapaly, joǵary damyǵan medısınalyq qyzmet kórsetýdegi ózge qalalardyń ozyq tájirıbeleri bizge óte qyzyq», - dep atap ótti óz kezeginde Baýyrjan Baıbek.

Samıt barysynda Almaty ákimi birqatar ekijaqty kezdesýler ótkizdi, onyń ishinde RF Vologod oblysynyń gýbernatory Oleg Kývshınnıkovpen, fransýzdyń Renn,nıderlandtyq Ýtreht qalalarynyń basshylarymen júzdesti.