Kólik reformasyn júzege asyrý aıasynda qalanyń jolaýshylar kóligin jańartý odan ári jalǵasýda. Jumys sapary kezinde Almaty ákimi Baýyrjan Baıbek qalaǵa kelgen jańa avtobýstardy kórdi.
Syıymdylyǵy úlken jańa avtobýstar №48 baǵyt boıynsha júredi, sonymen qatar № 12, 19, 56, 70, 77, 123, 124, 137 baǵyttar kúsheıtiledi.
Erteńnen bastap № 36, 51, 125 baǵyttaǵy eski gazelderdiń ornyna jańa avtobýstar qyzmet kórsete bastaıdy, bular qozǵalysy shekteýli jandar úshin qolaıly ári tar kóshelermen júre alady. № 40, 46,122 baǵyttar da kusheıtiledi.
Bulardan ózge, № 59, 69, 71 baǵyttardy jyljymaly sostav tolyq jańarady. № 8, 44, 74 baǵyttar boıynsha qosymsha avtobýstar shyǵady.
№205 baǵyt boıynsha jańa magıstraldy qozǵalys ashylady, ol Raıymbek dańǵyly boıymen «Barlyq» bazarynan qalanyń bastys jaǵyn jáne «Jetisý» bazarynyń shyǵys jaǵyn qamtıdy. Bul baǵyt boıynsha jolaýshylarǵa jańa 20 avtobýs qyzmet kórsetedi.
Almaty aglomerasıasy boıynsha jolaýshylardy tasymaldaý sapasyn arttyrý úshin Qaskeleń qalasyna qatynaıtyn uzyndyǵy 12 metrli avtobýstar júretin jańa baǵyt ashý josparlanýda.
Almaty ákimi Baýyrjan Baıbek qazirgi kezde kólik salasynda ashyq naryqtyq mehanızmderdiń jumys isteı bastaǵanyn atap ótti. Jyljymaly sostavty jańartý, arnaıy jolaqtar ashý arqasynda jolaýshylar aǵyny artýda.
«Eski ári tútin shyǵaratyn avtobýstar qalada júrýi tıis emes. Eger kórsetilgen qoldaýǵa qaramastan jeke tasymaldaýshy jyljymaly sostavty jańalamasa, onda olarmen kelisim buzylady. Jańa tehnologıalardy engizip, bolashaqta bir kólikten ekinshisine tegin aýysýdy qarastyrǵan jón. Jolaýshylardyń kólik jumysyna qanaǵattanýy – tasymaldaýdyń basty krıterııi. Jeke kólikti qazirgi deńgeıde ustap turý úshin laıyqty balama usyný qajet», - dep atap ótti megapolıs basshysy.
Aıta keterligi, qalaǵa jańadan kelgen tómen edendi LıAZ markaly avtobýstar kondısıonerlermen, vıdeobaqylaý kameralarymen jabdyqtalǵan jáne ekologıalyq synyptaǵy Evro-5 standartyna saı. Jyljymaly sostavtyń daıyndyǵyna oraı baǵyttarǵa shyǵýmen kezeńmen atqarylady.
Almatyda jyl aıaǵyna deıin jańa qoǵamdyq kóliktiń úlesi 87%-ǵa deıin jetetin bolady.
