AQSH-tyń saýda mınıstrligi quramyna elshilik korpýstarynyń, munaı-gaz salasyndaǵy amerıkandyq jetekshi kompanıalardyń, konsaltıńtik qyzmet, qurylys jáne basqa salalar ókilderi engen saýda mısıasymen Almatyda boldy.
Mısıa ókilderin qarsy alǵan megapolıs ákimi Baýyrjan Baıbek Almatynyń bıznes pen jeke kapıtal qalasy ekenin, munda iri halyqaralyq uıymdar men 60-tan astam transulttyq kompanıalardyń, elimiz bankteri men saqtandyrý kompanıalarynyń bas ofısteriniń 90%-nyń, 29 konsýldyq pen saýda ókildikteriniń ornalasqanyn aıtty. Osydan eki kún buryn ǵana BUU-nyń Úıi ashyldy. Halyqaralyq mektepter men ýnıversıtetter jemisti jumys isteýde, zamanaýı medısınalyq klaster qurylýda. Búgingi kúni Almaty álemdik ekonomıkanyń 70% quraıtyn 600 megapolıstiń qatarynda.
«Prezıdentimiz Nursultan Nazarbaevtyń salıqaly saıasatynyń arqasynda Almatyda turaqty ári jedel qarqyndy damyǵan ekonomıka qalyptasty. Bizdiń qalamyz ınvestısıa úshin tartymdy. 10 jyl ishinde Almatynyń tek ónimdi óńdeý óndirisine 3,3 mlrd. dollar sheteldik ınvestısıa tartyldy. Qyrkúıek aıynda japondyq, reseılik, ıtalándyq jáne qytaılyq ınvestısıamen tórt joǵary tehnologıaly zaýyttar iske qosyldy. Qalada túri salalarda amerıkandyq kapıtalmen 168 kompanıa jumys isteıdi, taýar aınalymy da joǵary, alaıda ekijaqty baılanystyń múmkindigi áli de tolyq paıdanylmaı keledi. Mundaı alqaly delegasıanyń Almatyǵa kelýi alǵash ret, sondyqtan biz amerıkandyq kompanıalarǵa tolyq qoldaý kórsetemiz», - dedi Baýyrjan Baıbek.
Óz kezeginde Almatydaǵy AQSH-tyń Bas konsýly Erık Maıer Almaty Astanamen birge eldiń ǵana emes, sonymen qatar barsha Orta Azıa óńiriniń kásipkerlik jáne ınovasıalyq haby ekenin atap ótti.
«Biz Prezıdent Nursultan Nazarbaevtyń túrli jáne ınovasıaly ekonomıkany órkendetý jolyndaǵy saıasatyn qoldaımyz. Búkilálemdik banktiń «Bıznesti júrgizý» esebi boıynsha bıylǵy jyly 36-shy orynǵa kóterilgen Qazaqstan bıznes- ahýaldy jaqsartýda. Almaty jáne Astana osy bastamalardyń avangardy bolýda. Bul Qazaqstan úshin ǵana emes, sonymen qatar Orta Azıanyń barlyq óńirleri úshin bıznes pen ınovasıa ortalyǵy», - dep atap ótti Erık Maıer.
Shara barysynda amerıkandyq kompanıalar ókilderi Almatynyń ınvestısıalyq múmkindikterimen tanysty jáne jergilikti iskerlik orta ókilderimen birqatar kezdesýler ótkizdi.
