Almatyda kólik reformasy aıasynda qalanyń qoǵamdyq kóligin jańartý jalǵasýda. №99 baǵyt boıynsha uzyndyǵy 12 metr bolatyn jańa avtobýstar júretin bolady, olar «Kóktóbeden» «Áıgerim» yqsham aýdanyna deıin barady.

Tómen edendi avtobýstar kondısıonerlermen, vıdeobaqylaý kameralarymen, eńkeıgish júıemen jabdyqtalǵan jáne Evro-5 ekologıalyq synyp talaptaryna saı.

Sonymen qatar, «Áıgerim» yqsham aýdanyndaǵy Baıtenov men Maıkop kósheleriniń qozǵalys bólikterinde uzyn kólikterdiń júrýine múmkindik joq, sondyqtan baǵyt syzbasyna shaǵyn ózgertýler engizildi, sońǵy aıaldama Sadovaıa kóshesine deıin uzarady.

Jańa avtobýstar atalǵan baǵyt boıynsha bıylǵy jyldyń 29 qazanynan júre bastaıdy.

Aıta keterligi, jyl aıaǵyna deıin Almatyda qoǵamdyq kóliktiń úlesi 87 paıyzǵa jetetin bolady. Jaqyn kúnderi qalaǵa taǵy 200 jańa avtobýs keldi.

«Eski ári tútin shyǵaratyn avtobýstar qalada júrýi tıis emes. Eger kórsetilgen qoldaýǵa qaramastan jeke tasymaldaýshy jyljymaly sostavty jańalamasa, onda olarmen kelisim buzylady. Jańa tehnologıalardy engizip, bolashaqta bir kólikten ekinshisine tegin aýysýdy qarastyrǵan jón. Jolaýshylardyń kólik jumysyna qanaǵattanýy – tasymaldaýdyń basty krıterııi. Jeke kólikti qazirgi deńgeıde ustap turý úshin laıyqty balama usyný qajet», - dedi keshe jańa avtobýstardyń tusaýkeserinde Baýyrjan Baıbek.