Almaty ákimdiginde qala aıaldamalarynda qoǵamdyq kólik qozǵalysynyń kestesin kórsetetin elektrondy tablolardyń qashan paıda bolatyny týraly aıtyldy.
«Ákimdik aıaldamalarǵa sıfrly tablolar ornatýǵa qarsy emes. Munda olardy qala búdjetinen tys qarjy esebinen ornatý týraly aıtyldy. Alǵashqy tablo Tımırázev kóshesi boıyndaǵy BRT jelisinde jyl sońyna deıin paıda bolady. Bul isti Kólik holdıńi óz moınyna alyp otyr. Megapolıs ákiminiń tapsyrmasyna oraı biz bul isti búdjetten tys qarjy esebinen oryndaımyz jáne qalanyń iri toraptyq aıaldamalaryn sıfrly tablolarmen qamtamasyz etemiz», - dedi Jolaýshylar kóligi jáne avtomobıl joldary basqarmasynyń basshysy Talǵat Hoschanov.
Ol óziniń sózinde 200 myńnan astam tutynýshynyń onlaın-rejımde karta boıynsha kólik qozǵalysyn «Ońaı» qosymshasyndaǵy QR-kody arqyly biletinin jetkizdi. 360 myń belsendi qoldaýnshy CityBus qosymshasyn paıdalanýda.
Jyl aıaǵyna deıin ár aıaldamaǵa qoǵamdyq kólik baǵytynyń nómiri, jumys ýaqyty kórsetilgen aktýaldy aqparat ilinedi.
Aıta keterligi, jyl aıaǵyna deıin Almatyda jańa qoǵamdyq kóliktiń úlesi 87 paıyzǵa deıin jetetin bolady. Ótken aptada qalaǵa taǵy 200 jańa avtobýs keldi.
«Eski ári tútin shyǵaratyn avtobýstar qalada júrýi tıis emes. Eger kórsetilgen qoldaýǵa qaramastan jeke tasymaldaýshy jyljymaly sostavty jańalamasa, onda olarmen kelisim buzylady. Jańa tehnologıalardy engizip, bolashaqta bir kólikten ekinshisine tegin aýysýdy qarastyrǵan jón. Jolaýshylardyń kólik jumysyna qanaǵattanýy – tasymaldaýdyń basty krıterııi. Jeke kólikti qazirgi deńgeıde ustap turý úshin laıyqty balama usyný qajet», - dedi keshe jańa avtobýstardyń tusaýkeserinde Baýyrjan Baıbek.
