Almaty ákimi Baýyrjan Baıbek jumys sapary kezinde qaıta jańarǵan Ortalyq mádenı jáne demalys saıabaǵyn aralap kórdi. Basqarýshy kompanıa jańa fontandar, balalar men sport alańdaryn salý úshin 1,6 mlrd. teńge jeke qarjyny ınvestısıalaǵan.

Ortalyq saıabaq aýmaǵynda jaryq baǵanalary, asfált tósenishter, trotýar plıtkalary jańarǵan, navıgasıa ornatylyp, jasyl jelek otyrǵyzylýda. Buryn kólik turaǵy bolǵan jerde sport alańdary, strıt-vorkaýt, basketbol jáne fýtbol alańdary, rollerdrom men skeıtodrom paıda bolǵan.

Jazǵy sahnanyń shyǵys jaǵynda túrli tústi alma baǵymen ınstallásıalanǵan jańa fontan nur shashyp tur. Sonymen qatar, 10 jyly bos turǵan eski sýburqaq rekonstrýksıalanǵan.

Memlekettik-jeke áriptestik prınsıpi boıynsha sonaý 90-shy jyldary isten shyqqan «Velotrek» qaıta jasalýda. Keler jyldan bastap saıabaqta balalardyń jańa qalashyǵyn qurý josparlanǵan.

Medeý aýdanynyń ákimdigi Ortalyq saıabaqqa aparatyn Gogol kóshesin abattandyrý jumystaryn júrgizýde. Jóndeý barysynda trotýarlar jańaryp, kóshe jıhazdary qoıylady. Buryn qalanyń tarıhı ortalyǵyn rekonstrýksıalaý kezinde Qaldaıaqov kóshesinen Jeltoqsan kóshesine deıingi Gogol kóshesiniń bir bóligi jańarǵan edi.

Aıta keterligi, jalpy Almatyda bıylǵy jyly 524 kóshe jóndeldi, 1400 eski aýla jańardy. 300 km aryq salyndy jáne jóndeldi, 800 km ınjenerlik jeli tartyldy.

Qalanyń barlyq jer asty ótpeli joldary jańardy.

Jyl aıaǵyna deıin barlyq kóshe jaryqtarynyń úshten biri jaryq dıodty jáne energıa jınaqtaýshy shamdarǵa aýystyrylady, al jańa qoǵamdyq kóliktiń úlesi 87%-ǵa jetedi.