Almatyda jarty mıllıon abonement úıin gazben jylytady. Saqyldaǵan sary aıaz qysqan kezde qysym kemip, turǵyndardyń tońýy jylda qaıtalanady. Al jyl saıyn kezdesetin keleńsizdik bıyl bolmaıdy dep otyr monopolıser. Turǵyndar qara sýyqta kógildir otynnyń tapshylyǵyn tartpas úshin jaýaptylar qansha mıllıon tekshe metr gazǵa tapsyrys bergen?
Kómir jaǵýdyń qıyndyǵynan qutylǵan qart ananyń biri – Bátıma Jumabekqyzy. Sýyqta ózinen buryn nemereleriniń tońbaýyn tún tolǵanyp ýaıymdaıtyn apa, qara altynnyń tapshylyǵymen qosa qymbattaǵanyn oılap qınalǵan kúnderi az bolmaǵan. Jetpis jastan asqan qarıa budan bylaı kómir tasyp, kúl shyǵarýdan tolyq qutyldy. Aıtýynsha, «Altyn alqasynyń» arqasynda elý paıyz jeńildikpen úıine gaz qostyrǵan.
«Munyń aldynda biz kómir jaǵatynbyz. Kómir tasyp, otyn jaryp, kádimgideı qınalatynbyz. Jylyna 7-8 tonna kómir jaǵatynbyz. Al gaz qosqaly rahat boldy. Elý paıyz kómekpen maǵan gaz qosyp berdi. Ázir úıimizde jyly, asymyz da gazben pisip jatyr. Gazdyń basshylaryna raqmet. Nemerelerim de jyly úıde ósip jatyr», – deıdi Bátıma Fazylova.
Aýa raıyn boljaýshylar turǵyndary tyǵyz ońtústik óńirde bıylda qystyń qatty bolatynyn, aıazdy kúnderdiń az bolmaıtynyn eskertti. Al ótken jyly kún kúrt sýytqanda gaz qysymy kemip, peshi janbaı, qubyry qatqan halyq aptalap qıyndyq kórgen edi. Ótkennen sabaq alǵan monopolıser keleńsizdik qaıtalanbaý úshin qysym rettegish qurylǵylar men kólemi keń qubyrlardy bıyl qaıta qoıdyq deıdi.
«Rettegish quraldarynyń 20-sy jańadan qoıylyp, 35-i jańadan jóndelip aýystyryldy. Bári zamanaýı gaz retteýish qurylǵylaryna rettelip qoıyldy. Aýyldy úlken qysymnan ortasha qysymǵa túsirip, halyqqa jetkizip otyrý úshin qoıyldy», – dedi Almaty oblysy Gaz sharýashylyqtary qaýymdastyǵynyń bas ınjeneri Meırambek Ábishbaev.
Jylýǵa jarymaı, jaýraǵan jurt ásirese, Qarasaı, İle aýdandarynyń aýmaǵynda kóp bolǵan edi. Almaty oblysy gaz sharýashylyqtarynyń basshylary bolsa Jambyl, Talǵar, Naýryzbaı jáne Alataý aýdandaryndaǵy 63 myń jeke turǵyn úı men balabaqsha, mektep syndy 3500-den astam ózge de áleýmettik nysandardy qystan qysylmaı alyp shyǵamyz dep otyr. Aýmaqty kógildir otynmen qamtý aıasynda januıanyń sanatyna qaraı jeńildik jasalady.
«Gaz qysymynyń tolyqtaı jetýin biz basty mindet dep qadaǵalap otyrmyz. Tolyqtaı jetý maqastynda qosymsha gaz jelisi jáne shkaftyq gaz retteý quraldary qoıyldy. Bizdiń Almaty oblysyna qarasty jańaǵy Qarasaı, Talǵar, Jambyl aýdany jáne Almaty qalasynyń Qarasaı, Naýryzbaı aýdandarynda barlyq somasy 20 mıllıonǵa jýyq jeńildikter jasalynyp, kógildir otynmen qamtyp otyrmyz», – dedi Almaty oblysy Gaz sharýashylyqtary qaýymdastyǵy tóraǵasynyń orynbasary Rústem Ótembaev.
Al Almaty qalasynda 500 myńdaı abonement jeke gaz peshine táýeldi. Oblyspen salystyrǵanda qalada gazǵa qosylý quny áldeqaıda tómen. Jumys ınvestısıalyq baǵdarlama aıasynda jasalǵandyqtan, gaz tartqyzý aqysy 150 myń teńge.
«Byltyrǵydaı 30 gradýstaı salqyn bolýy múmkin. Biz bul sýyqqa daıynbyz. Barlyq jabdyqtarymyz oryndalǵan. Jabdyqtarymyz qolymyzda. «QazTransGaz» jaǵynan gaz mólsheri de, kólemi de bar. Qysqa daıynbyz», – dedi «QazTransGazAımaq» AQ Almaty óndirisiniń dırektory Baqtıar İzbasarov.
Ótken jyly 1 mıllıard 100 mıllıon tekshe metr gaz jaǵylǵan edi. Al aldaǵy jylý maýsymy kezinde jarty mıllıon úıdiń suranysyn qamtamasyz etý úshin 1 mlrd 200 mln tekshe metr gazǵa tapsyrys berilipti.
