Almatynyń komýnaldyq qyzmetteri qytymyr qysqa tastúıin daıyn. Bıyl elimizde qaharly qys bolatynyn eskergen jaýapty basqarma ókilderi, qala kóshelerin aq ulpadan arshýǵa 3 myńǵa tarta adam jumyldyrmaq. Al qardy 1 myńnan astam arnaıy tehnıka tazartady. Onyń 13-i endi ǵana satyp alynǵan sý jańa mashına eken. Jalpy, alyp shahardy kóktaıǵaqtan qorǵaıtyn qospalar qory jetkilikti me?

Komýnaldyq qyzmetkerler úshin qala kóshelerin tazartýǵa arnalǵan taptyrmas tehnıkanyń biri – myna dattyq mashına. Kópfýnksıonaldy «Epok» tehnıkasy jazda kóshelerdi jýýǵa qoldanylsa, qysta aq ulpadan aryltýǵa qolaıly eken. Kóliktiń ústindegi sısternaǵa 6 tonna tuz quıylyp, kóshelerdi kóktaıǵaqtan qorǵaý úshin sebiledi. Artynsha arnaıy shetkasy erigen muzdy tazartyp shyǵady. Buǵan deıin qalada mundaı aýyr tehnıkanyń 14-i jumys istep kelgen edi. Kóliktiń tıimdiligin kórgen komýnalshylar endi bıyl olardyń taǵy altaýyn satyp almaq.

«Tuz sepkende ár sharshy metrge qansha gram kerek ekenin ózi avtomatty túrde anyqtap shyǵady. Ol jaýǵan qar mólsherine baılanysty, temperatýra da avtomatty túrde rettelip otyrady. Tuz sepkennen keıin jol qatpaıdy. Biz buryn qum sebetin edik qoı, al bul mashınalar qum seppeıtindikten jol taza bolyp qalady. Keıin kóshelerdi sypyrý da ońaıǵa túsedi», – dedi «Almaty tazalyq» MKK Bostandyq aýdany boıynsha basshysy Nurlan Saqbaev.

Bıyl jalpy sany 1050 arnaıy tehnıka qala kóshelerin qardan tazartady. Onyń 13-i endi ǵana satyp alynǵan sý jańa mashınalar eken. Kólikterdiń qatarynda «Epok» tehnıkasynan bólek, trotýarlardaǵy kók muzdy kúreýge arnalǵan shaǵyn traktorlar da bar. Jalpy, Almatydaǵy qardan arshylatyn kóshe aýmaǵy 23 mıllıon sharshy metrden asyp jyǵylady. Onyń 60 paıyzdan astamyn «Almaty tazalyq» mekemesi tazalasa, qalǵan aýmaqty aq ulpadan aryltý 13 shaǵyn kásiporynnyń moınynda.

«Bıyl bizdiń mekememizde jalpy sany 628 tehnıkamyz bar. Onyń barlyǵy qysta jumys isteıdi dep aıta almaımyn. Shamamen, 500-den astam kóligimiz qar tazalaýǵa jumyldyrylady. «Jetbroom» tehnıkamyzdyń sanyn 8-ge jetkizdik. Ol ásirese, magıstraldy úlken kóshelerdiń qaryn kúreýge qolaıly. Sondyqtan bul tehnıkany osy qysta birjaqty qozǵalystaǵy kóshelerdi tazartýǵa qoldanamyz», – dedi «Almaty tazalyq» MKK dırektorynyń orynbasary Aleksandr Kın.

Byltyr qaladaǵy júrginshilerge arnalǵan kóshelerdiń qaryn kúreýge Shveısarıadan ákelingen shaǵyn 20 «ponı» tehnıkasy qoldanylǵan. 50 shaqty jumysshy sol aýmaqtardyń tazalyǵyna jaýapty bolǵan edi. Osy qysta da bul jumystar óz jalǵasyn tappaq. Abaı, Abylaı han jáne Nazarbaev dańǵylyndaǵy kespetas tóselgen jerlerdi tazartýǵa 5 shaǵyn traktor bólinip otyr.  

«Osy qysqa 72 myń tonna qum aralas hlor qospasy men 15 myń tonna tuz daıyn tur. Esebimiz boıynsha qospalar jetýi tıis. Biraq qar qalyń tússe qajetinshe qosymsha taǵy ákelemiz», – dedi Almaty qalasy Tabıǵı resýrstar jáne tabıǵatty paıdalanýdy retteý basqarmasynyń bólim basshysy Aleksandr Sergeev.

Qalanyń komýnaldyq qyzmet ókilderi qysqy maýsymǵa tastúıin daıynbyz dep sendirdi. Olar tehnıkalarǵa janar-jaǵarmaı qory da jetkilikti ekenin aıtady. Aıta ketsek, bıyl qys qaharly bolatynyn eskergen jaýapty mekemeler jumysshylardyń sanyn da arttyrýǵa bekinip otyr. Osy jyly qar kúreý jumystaryna 3000-ǵa jýyq adam jumyldyrylady.