Almatydaǵy zeınetkerlerge arnalǵan kúndizgi ortalyqta «Jyl ájesin» tańdaıdy. Qatysýshylar daıyndyqty bastap ta ketipti. İs tigip, taǵam ázirleýden bólek, qarıalar qoǵamda belsendi ekenin de dáleldeýi tıis. Ortalyqqa kelýshilerdiń deni mundaǵy saýyqtyrý sharalarynan keıin belsendi bolýǵa beıimdelip jatqan kórinedi.

Yrǵaqty «Qara jorǵa» ánine bılep jatqan qarıalar bir sát ózderiniń jan aýrýlary men tán aýrýlaryn umytqandaı. Toptyq bı – psıhologıalyq ádisterdiń bir túri. Mamandardyń aıtýynsha, onyń nátıjesi de jaman emes. Qarttarǵa arnalǵan kúndizgi ortalyq táýligine 56 adamdy qabyldaı alady. Dári-dármeksiz emdeý ýaqyty 2 aıǵa eseptelgen.

«Qarttardyń osynda bolatyn 2 aıynda baıqaǵanymyz, kóńilderi kóterilip, artyq salmaqtaryn tastap, qan qysymdary men qant deńgeıi tómendedi. Sonymen qatar, psıhologıalyq jaǵdaıy da jaqsarady. Olar munda sóılesip, áńgimelesý úshin keledi. Jańa dostar taýyp, kýrstan keıin de bir-birimen qarym-qatynasty ustap otyrady», – dedi «Kúmis ǵasyr» qoǵamdyq qorynyń joba jetekshisi Aınur Eshmanova.

Ómiriniń qyryq jylyn balalarǵa bilim berýge arnaǵan 69 jastaǵy Dına Esqaraeva – ortalyqtyń belsendi múshesi. Osynda bolǵan bir jarym aıdyń ishinde densaýlyǵynyń jaqsarǵanyn aıtady. Endi bos ýaqytyn ıogamen, aıkýnemen aınalysýǵa arnaımyn deıdi. Aıta keteıik, Aıkýne – kóshpendi halqymyz ustanǵan qazaq gımnastıkasynyń bir túri.

«Denemdegi kóp aqaýlarymdy jóndep kelemin. Belim aýyratyn edi, odan múldem saýyqtym deýime bolady. Basym da aýyratyn. Jasy úlken adamdardyń qan tamyrlarynyń tarylatyny belgili ǵoı, ol jaǵy da rettelip qaldy», – deıdi Dına Esqaraeva.

Ortalyqqa joldama alý úshin birneshe kezeńnen ótý kerek. Aldymen ýchaskelik dáriger men Halyqqa qyzmet kórsetý ortalyǵynda birneshe qujattardy alýy tıis. Sodan soń zeınetkerde qant dıabeti men esin joǵaltý sekildi aýrýy bolsa, qarttarǵa arnalǵan kúndizgi ortalyqqa kezekke qoıady.

Bıyl jazda ashylǵan mekeme zeınetkerler arasynda suranysqa ıe bolyp úlgergen. Fızıkalyq jattyǵýlardan bólek, munda mamandardyń keńesteri de tegin beriledi. Ortalyqtaǵy ájeıler qazir saıysqa daıyndyq ústinde. Skandınavıalyq júris boıynsha óz ónerlerin kórsetedi. Odan ózeg, «Jyl ájesi» birneshe talaptar boıynsha iriktelmek.

«Jyl ájesi óziniń belsendi ekenin dáleldep, qaladaǵy ótip jatqan oqıǵalardan habardar bolýy tıis. Sonymen qatar, sándi kıim úlgisin de kórsetedi», – dedi «Kúmis ǵasyr» qoǵamdyq qorynyń joba jetekshisi Aınur Eshmanova.

Qarıalar ýaqyttaryn ortalyqta ǵana emes, ortalyq syrtynda da jaqsy ótkizip, mýzeıler men taýǵa jıi baryp turady.