Almatyda Elbasy joldaýyn túsindirý jumystary qarqyndy júrip jatyr. Osy ýaqytqa deıin 150-ge jýyq is-shara ótken. Búgin prezıdent joldaýyndaǵy kózdelgen mindetterdi keńinen túsindirý maqsatynda premer-mınıstrdiń orynbasary Erbolat Dosaev bastaǵan top «ońtústik astanaǵa» arnaıy keldi. Qalalyq ákimdikte vıse-premer men halyq qalaýlylary joldaýdy keńinen talqylap, ony júzege asyrý josparlarymen bólisti.
Mańyzdy jıynǵa Erbolat Dosaev bastaǵan Respýblıkalyq aqparattyq toptan jalpy sany 13 adam arnaıy kelgen. Kezdesýge qalalyq qurylymdardyń basshylary, aýdan ákimderi, máslıhat depýtattary jáne qoǵamdyq keńes músheleri qatysty. Qala aktıvimen kezdesýde alǵash bolyp sóz alǵan Erbolat Dosaev kelesi jyldan bastap eń tómengi jalaqynyń qansha teńgege ósetinine toqtaldy. Onyń aıtýynsha, bul maqsatqa jyl saıyn 86 mıllıard teńge bólinedi eken.
«Qazaqstan boıynsha 1 mıllıon 300 myń qyzmetkerdiń jalaqysy ósetin bolady. Sonyń ishinde Almatyda 176 400 qyzmetkerdiń aılyq jalaqysyna 30 paıyz qosylady. Azamattyq qyzmettegi 275 myń jumysshynyń jalaqysy 35 paıyzǵa artady», - dedi QR premer-mınıstriniń orynbasary Erbolat Dosaev atalǵan jıyn barysynda.
Búgingi tańda Almatyda Elbasy joldaýyn túsindirý jumystary qarqyn alǵan. Qala ákimi Baýyrjan Baıbektiń aıtýynsha, ótkizilgen 150-ge jýyq is-shara 14 myńnan astam adamdy qamtypty. Bul jumystar odan ári de jalǵasa bermek.
«Biz qalalyq ákimdik tarapynan naqty is-sharalar josparyn bekittik. Sol boıynsha jumysty bastap kettik. Sondyqtan, úkimettiń qoldaýymen biz Elbasy bergen tapsyrmalardy tolyq jáne ýaqytyly júzege asyramyz», - dedi Almaty qalasynyń ákimi Baýyrjan Baıbek.
Sonymen qatar, joldaýda aıtylǵan ınfraqurylymdy jaqsartý máselesi de sóz boldy. Ótken jyly elimizde 100 myńnan astam januıa baspanaly bolǵan eken. Al, Almatyda 16 myń 482 páterli turǵyn úıdiń irgetasy qalanǵan. Jańadan salynyp jatqan úılerge ınjenerlik júıelerdi tartý úshin Elbasy tapsyrmasy boıynsha jyl saıyn 100 mıllıard teńgege jýyq qarajat bólinbek.
«Almaty ákimdigi Elbasy joldaýy boıynsha qarqyndy jumys istep jatqan alǵashqy qala. Munda jastardy qoljetimdi baspanamen qamtý baǵdarlamasy oń nátıje berip jatyr. Mundaı tájirıbeni basqa óńirlerdegi jergilikti bılik ókilderi de qoldanyp bastady. Bul óte jaqsy kórsetkish dep oılaımyn», - dep atap ótti QR Investısıalar jáne damý vıse-mınıstri Qaıyrbek Óskenbaev.
Keler jyldyń 1 qyrkúıegine qaraı 2030 jylǵa deıingi aýmaqtyq-keńistiktik damýdyń strategıasy jasalady, munda basqarylatyn ýrbanızasıaǵa asa mán berilmek. Halyqty ornalastyrý, óńirlerdiń arnaıy salalaryn anyqtaý, ónidiristi damytý, ınfraqurylymdy qamtamasyz etý osy prızma arqyly júzege asady, al bul el óńirlerinde kishi ýrbanızasıanyń damýyna tyń serpin beredi.
Sonymen qatar, jıynda óńirlerdegi turǵyndardyń ómirin jaqsartý «Nurly Jol» jáne «Nurly Jer» syndy baǵdarlamalardy 2025 jylǵa deıin júzege asyrýmen tikeleı baılanysty ekeni aıtyldy. Almatynyń ózinde ǵana jyl aıaǵyna deıin 2 mln sharshy metr turǵyn úıdi iske qosý josparlanǵan.
