Almatyda qazan aıynyń aıaǵyna deıin 30-ǵa jýyq jańa art-nysan qoıylady. Olardyń arasynda 3 metrlik temir teńge, tanymal sýretshi Kalmykovtyń sómkesi sıaqty ınstallásıalar bar. Joba avtorlary shaǵyn arhıtektýralyq formalar almatylyqtar ǵana emes, týrıser arasynda da qyzyǵýshylyqqa ıe bolatynyna senimdi. Al nysandardyń ózderi ınteraktıvti jáne buzaqylardyń buzýynan qorǵalǵan.
«Mundaı biregeı art-nysandar almatylyqtar arasynda ǵana emes, sheteldik týrıserdiń de súıikti ornyna aınaldy. Óıtkeni, biz ornatylǵan nysandardyń barlyǵyna kún saıyn monıtorıń júrgizip otyramyz. Sol kezde baıqadyq. Menińshe, qazir muhıttyń ar jaǵynda da jyly da ásem Almatyny eske salyp turatyn sýretter bar degen oıdamyn», – deıdi jas sýretshiler ortalyǵynyń jetekshisi Krıstına Bekmýrzaeva.
Al bıiktigi eki jarym metrdi quraıtyn alyp áripter bitýge jaqyn. Ony aldymen boıaýly untaqpen kómkerip, artynsha joǵary temperatýradaǵy peshke salady. «Almatyny súıemin» degen jazýdaǵy árbir áripte qalanyń tarıhynan habar beretin petroglıfter men kópqabatty úılerdiń beınesi beınelengen. Árqaısysy 300 keli tartady. Almatylyqtardyń nazaryna aıdyń aıaǵyna deıin usyný josparda bar.
«Búginde ornatylýy tıis 60 art-nysannyń 32-si ornatyldy. Qalǵan 28-i osy aıdyń aıaǵyna deıin qalamyzdyń belgilengen aýmaqtaryna qoıylady. Qazir sońǵy jumystar jasalyp jatyr. Olardyń arasynda turǵyndar úshin erekshe bolyp kórinetin birnesheýin atap ótkim keledi. Mysaly, 3 metrlik alyp temir teńge. 2016 jyly Almaty qalasy óziniń 1000 jyldyǵyn toılady. Osy teńge Almatynyń tarıhy áriden ekenin bildiredi. Odan keıin «Men Almatyny súıemin» atty ınteraktıvti ınstallásıa almatylyqtardyń súıikti ornyna aınalatynyna senimdimin», – dedi Park Fest festıvaliniń dırektory Olga Sultanova.
Qazaq ertegilerinde kezdesetin salt mingen Aldar kóseniń mynadaı músini Nazarbaev dańǵyly men Qarasaı batyr kósheleriniń qıylysynda ornalasqan. Onyń avtory Rýslan Aqanaev. Bir ereksheligi, Aldar kóseniń músini eski kólikterdiń bólshekterinen jasalǵan.
Tekshe, qumyralar, kitap pen túrli-tústi ulýlar «Park Fest» halyqaralyq festıvaliniń aıasynda qala kóshelerine qoıylyp úlgerdi. Qazaqstandyq sýretshiler men músinshilerdiń jumysynan bólek, Belarýs, Qyrǵyzstan, Ózbekstan men Tájikstannan kelgen sýretshiler Almatynyń kórkine ajar berýge atsalysypty. Ornatylǵandardyń barlyǵy ásemdikti ǵana emes, tabıǵatqa etene jaqyn bolyp, ekologıaǵa mán berýge úndeıdi.
«Bul halyqaralyq Creating Art jobasynyń bir bóligi. Oǵan Qytaıdan bastap, Aýstralıaǵa deıingi 400-den astam nysan kiredi. Bul Almaty úshin estetıkalyq jaǵynan mańyzdy oqıǵa ǵana emes, qalany tanytý úshin qajet dep aıtar edim. Sondaı-aq, qalamyzdy týrısik tartymdy qala retinde de aıqyndaıdy», – deıdi Park Fest festıvaliniń keńesshisi Olga Veselova.
Alma pishinindegi mehanıkalyq saǵat «Almaty-1» temirjol vokzaly aldynda ornalasqan. Onyń munda qoıylýynyń da ózindik sebebi bar eken. Úlken shahardyń ómirinen habar beredi. Al jaqynda ataqty sýretshi Kalmykovtyń úshburyshty sómkesin beıneleıtin art-nysan paıda bolady. Barlyq ınstallásıalar men shaǵyn arhıtektýralyq formalar qala tirshiliginen habar berip, onyń tarıhynan syr shertpek.
