Aqtóbede avtobýs órtine qatysty qylmystyq is boıynsha úkim shyǵyp, sottalýshylar 3,6 jyl men 5 jylǵa bas bostandyqtarynan aıryldy. Sonymen qatar, sottalýshylar birlesip, jábirlenýshilerdiń árqaısysyna 2 mıllıon teńge moraldyq shyǵyn óteýi tıis, dep habarlaıdy Qamshy.kz aqparat agenttigi Aktobenews.kz saıtynyń deregine súıenip.
«Jábirlenýshilerdiń moraldyq zıandy óteý týraly azamattyq talap aryzdary ishinara qanaǵattandyrylsyn. Sottalǵandar Nurjan Qyrǵyzbaev, Maqsat Pernebekov, Barat Tańatov, Bahadúr Perdebaev, Nurlybek Tilepbaevtan ortaq túrde jábirlenýshilerdiń árqaısysyna 2 mıllıon teńge óndirilsin. Zań boıynsha moraldyq shyǵyndy óteýge 1 aı ýaqyt beriledi», — dedi Yrǵyz aýdandyq sotynyń sýdıasy Serik Mahambetov. Barlyǵy 43 otbasyǵa 2 mıllıon teńge óndiriletin boldy. Sonda 43 adam úshin 2 mıllıon teńgeden óndirilse, barlyǵy 86 mıllıon teńge eseptelip otyr. Al 5 sottalýshyǵa bólgende, árqaısysy ózbektsandyqtardyń otbasyna 17,2 mıllıon teńge tóleýi tıis.
Aıta keteıik, jábirlenýshilerdiń 10-nan astamy moraldyq shyǵyn talap etpedi. Sot úkimi oqylǵan soń sottalýshylardyń týystary ózbekstandyqtartyń talap aryzy boıynsha árqaısysyna 2 mıllıon teńge taýyp bere almaıtynyn jetkizdi.
«Bizdiń 7 balamyz bar, esh jerde jumys istemeımiz. Biz ózbekstandyqtardyń talap aryzyn oryndaı almaımyz. Qazir 7 balany qalaı baǵamyn dep oılap otyrmyn. Búgin jeńildik jasap, bosap shyǵarady dep oıladym»,- deıdi Barat Tańatovtyń jubaıy Aınur Tańatova.
♦52 ózbekstandyqtyń ómirin qıǵan qaıǵyly jaıtqa kim kináli ekeni belgili boldy
♦Avtobýsta tirideı órtengen 52 azamattyń týystary: Balalarymyz tiri...
Sot zertteýinde belgili bolǵandaı, avtobýsqa úsh júrgizýshiden bólek 54 ózbek azamaty mingen. Júrgizýshiler Shymkentten salqyn aıazǵa shydamaıtyn janarmaı quıady. Yrǵyz aýdanynyń tusynda janarmaıy qatyp, qozǵaltqyshy isten shyqqan avtobýs toqtap qaldy.
Júrgizýshiler janarmaı bagyn dánekerleýshi shammen qyzdyrǵan. Olar tergeý kezinde jeke basy anyqtalmaǵan áıelden bes lıtr benzın satyp alǵany anyqtaldy. Janarmaıdyń 1,5 lıtrin dánekerleý shamyna quıyp, qalǵan 3,5 lıtrlik benzındi alyp júrgizýshi Qyrǵyzbaev avtobýsqa kirgen.
Salon ishine "paıalnıkpen" aıaǵyn qyzdyrady. Sol kezde qastaryna basqa avtobýs kelip toqtaıdy. Qyrǵyzbaev pen Tańatov dánekerleý otyn sóndirmeı, toqtaǵan avtobýsqa qaraı shyǵyp ketken. Avtobýstan birinshi shalbary janyp, jolaýshy Isaqov shyǵady. Keıin Qyrǵyzbaev pen Tańatov avtobýsqa júgiredi. Aıtýlarynsha, qutqarýǵa úlgermeı qalǵan. Jolaýshy Myrzahmetov pen júrgizýshi Pernebekov jaraqat alyp, salonnan shyǵyp úlgeredi. Júrgizýshiler shyńǵyrǵan daýystar toqtaǵanǵa deıin órtti óz erikterimen sóndirmek bolady.
Eske sala keteıik, Ózbekstan azamattary mingen "Ikarýs" avtobýsy 18 qańtar kúni "Samara-SHymkent" baǵytynyń 1069 shaqyrymynda, Aqtóbe oblysy Yrǵyz aýdanynyń tusynda órtke orandy. Órtengen avtobýs ishinen shyǵa almaǵan 52 adam tirideı janyp ketip, ajal qushqan edi. Al avtobýs ıesi Ordýhan Mehteev áli kúnge deıin izdeýde júr.
