Dárigerlerdiń de ustazdar sekildi statýsy zańdastyrylsa. Almatylyqtarmen Elbasy joldaýyn talqylaýǵa kelgen Parlament májilisiniń depýtaty Omarhan Óksikbaevqa aq halattylar osyndaı usynys aıtty.

Al búgin májilis depýtaty elektrlik lıfti shyǵaratyn «Alataý» kompanıasynyń jumysshylarymen kezdesti. Óndiris orny 30 adamdy jumyspen qamtyp otyr. Munda 400 keliden 2 tonnaǵa deıin júk kótere alatyn elektrli jedelsatylar shyǵarylady. Kompanıa ónimderi elimizben qatar, TMD elderiniń de naryǵyna jetkiziledi.

Kezdesý barysynda kompanıa jumysshylary depýtatqa óz saýaldaryn joldady. Aıtýlarynsha, otandyq taýar óndirýshi retinde ózimizdiń tutynýshylardan túsetin suranystyń azdyǵy alańdatady eken.

«Qaýipsizdik máselesine den qoıa otyryp, bul kompanıanyń shyǵaryp jatqan ónimderi úlken suranysqa ıe bolady degen senimim zor. Degenmen, ózderiniń de otandyq taýarǵa suranys máselesiniń áli tolyq sheshilmeı jatqanyn aıtýda. Ortalyqqa baryp, Úkimette osy máseleni de kóteremin ǵoı degen nıettemin», – dedi QR Parlamenti májilisiniń depýtaty Omarhan Óksikbaev.

Joldaýdaǵy ár salaǵa bólingen qarjynyń tıimdiligin arttyrý máselesi de almatylyqtar tarapynan úlken qoldaý taýyp otyr. Sonymen qatar, ınflásıaǵa tótep beretin sharalar kúsheıtilse deıdi jurt.