Almatylyqtardyń komýnaldyq qyzmet aqysyn tóleýge memleket járdemdespek. Biraq bári birdeı emes, tek belgili bir sharttarǵa saı keletin jandar ǵana osy qaıyrymdylyqtyń qyzyǵyn kóre alady.  

Mundaı járdem 2500-ge jýyq otbasyǵa berilmek. Osy maqsatta búdjetten 55 mıllıonǵa taıaý teńge bólingen. Kómek komýnaldyq shyǵyn januıa tabysynyń on paıyzynan asqan jaǵdaıda ǵana jasalady.  

«Mysaly, belgili bir otbasynyń tabysy 70 myń teńge bolsa, biraq ol otbasynyń komýnaldyq tólemder shyǵyny 12 myń teńgeni quraıtyn bolsa, osy turǵyn úı kómegin ala alady. Iaǵnı, atalǵan otbasyǵa 5 myń teńge kóleminde turǵyn úı kómegi taǵaıyndalady», – dedi Almaty qalasy Jumyspen qamtý jáne áleýmettik baǵdarlamalar basqarmasynyń bas mamany Rústem Ismaılov.

Atalǵan qoldaýǵa ıe bolý úshin turmysy tómen otbasylar Halyqqa qyzmet kórsetý ortalyǵyna baryp, jeke kýáliginiń kóshirmesin, mekenjaıy men jumys orny jónindegi anyqtamalardy ótkizýi tıis. Sonymen qatar, komýnaldyq qyzmetterge tólengen túbirtekterdi kórsetýi qajet. Osy ýaqytqa deıin 2200-den asa otbasyǵa 40 mıllıon teńge shamasynda turǵyn úı kómegi tólengen.  

«Turǵyn úı kómegin alýda jylytý kezeńinde adamdardyń kóp júginetinin eskere ketken jón. Soǵan baılanysty bizdiń basqarma mamandarymen, sonymen qatar, aýdandyq basqarma bólimderi mamandarymen aqparattyq túsindirme jumystary júrgizilýde. Sonymen qatar, aýdandyq basqarma bólimderi Páter ıeleri kooperatıvterin jınap, osy turǵyn úı kómegi boıynsha túsindirme jumystary júrgizilýde. Ary qaraı Páter ıeleri kooperatıvteri turǵyndarǵa túsindirme jumystaryn júrgizedi», – dedi Rústem Ismaılov.