Úlken Almaty aınalma avtomobıl joly aqyly bolady.  Bul týraly búgin Úkimet otyrysynda memlekettik-jekeshelik áriptestikti damytý máseleleri boıynsha baıandaǵan  QR Investısıalar jáne damý mınıstri Jeńis Qasymbek aıtty.

Jeńis Qasymbektiń aıtýynsha, «Úlken Almaty aınalma avtomobıl jolyn salý jáne paıdalaný» jobasy boıynsha 2018 jyldyń 7 aqpanynda  mınıstrlik «Alsım Alarko - Makıol - SK - Koreıan EkspressVeı» Konsorsıýmymen kelisimshartqa qol qoıǵan.

«Búgingi kúni tolyqtaı qurylysqa jer bólý máselesi sheshildi. Ýchaskelerge tehnıka men jumysshylardy jumyldyrý tolyqtaı aıaqtaldy, karerler rásimdeldi jáne aǵymdaǵy  jyldyń 31 mamyrda qurylys jumystary bastaldy. 2021 jyly qurylys jumystaryn aıaqtap, joldy aqyly negizde paıdalanýǵa berý kózdeledi»,-  dedi ol.

Mınıstrdiń dereginshe, qurylys kezeńinde 3 myńǵa jýyq jumys orny ashylady.

«Jol táýligine 38 myń avtokólik quralynyń qala syrtyna shyǵýyna múmkindik beredi jáne qalanyń ekologıasyna oń áser etedi», - dedi Jeńis Qasymbek.

Jalpy onyń dereginshe, Investısıalar jáne damý mınıstrligi jetekshilik etetin salalarda memlekettik-jekeshelik áriptestik mehanızmi  boıynsha 18 joba pysyqtalyp, iske asyrylyp jatyr.

Atap aıtqanda, 3 joba avtomobıl joldary salasynda, 1 joba temirjol kóligi salasynda, 2 joba azamattyq avıasıa salasynda, 12 joba turǵyn úı-kommýnaldyq sharýashylyǵy jáne energıa únemdeý salalarynda.