Almatyda Jastar sleti ótip jatyr. Eriktilerden quralǵan stýdentterdiń respýblıkalyq sletine 17 aımaqtan júzden asa delegasıa kelgen. Olar aldaǵy tórt kún qatarynan túrli semınarlarǵa qatysyp, trenıńter barysynda tájirıbe jınaqtaıdy.

Sharanyń saltanatty ashylýy barysynda erikti túrde túrli jumystarǵa belsene aralasqan jastar marapattaldy. Jalpy, elimizdegi eriktilerdiń arqasynda aýqymdy sharalar ótkizilip keledi. Máselen, osydan jeti jyl buryn Almatyda ótken qysqy Azıa oıyndarynda, stýdentter arasynda ótken Ýnıversıada men EHRO syndy iri-iri sharalarǵa jastar belsene aralasty.  

«2016 jyldyń jeltoqsan aıynda  volonterlar týraly zańǵa qol qoıylǵan bolatyn. Sol zańdy túsindirý, sol baǵytta qandaı quqyqtary bar sony nasıhattaý baǵytynda jumystar atqarylady. Sonymen qatar, búgingi kúni halyqaralyq donor, halyqaralyq uıymdar jáne halyqaralyq tájirıbe boıynsha jumystar atqarylýda. Qazir úlken onlaın platforma jasap jatyrmyz. Oǵan erikti túrde tirkelý arqyly óziń týraly tolyqqandy aqparatty qaldyrýǵa múmkindik bolady», – deıdi QR Qoǵamdyq damý mınıstrligi Azamattyq qoǵam komıteti tóraǵasynyń orynbasary Baqytjan Narymbetov.  

«Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Elbasynyń bıylǵy joldaýy da talqylanyp, aldaǵy «Jastar jylynyń» mańyzdylyǵy túsindirildi. Jalpy, «Eriktiler» degen uǵym resmı túrde elimizde 1993 jyldan bastap qoldana bastaǵanmen, kez kelgen iske kómek kórsetý, asarlatý, el bolyp is bitirý syndy uǵymdar qazaq halqynyń ǵurpynda burynnan bar. Statısıka boıynsha elimizde 22 myńnan astam erikti bar eken. Biraq bul kórsetkish damyǵan eldermen salystyrǵanda az. Máselen, Irlandıa halqynyń 33%-y volonter bolsa, Germanıanyń árbir úshinshi azamaty, japon halqynyń 4/1 bóligi volonterlyq jumysqa belsene aralasady eken.          

«Kelesi jyl «Jastar jyly» dep jarıalandy. Jastardyń páter máselesine qatysty Elbasy jarlyq shyǵaryp, qamqorlyq kórsetip jatyr. Jalpy, jastarǵa kóptegen jaǵdaılar jasalýda. Jastar ónsin, óssin, bizdiń memleketimiz alǵa qaraı júre bersin dep tileımiz. Sondyqtan aýyldaǵy balalar da osynda bilim alyp, aýyldy da kórkeıtsin», – dedi Qoǵamdyq keńestiń múshesi Maıra Saǵymbekova.