Jyl sońyna deıin 1,5 myń almatylyq «Nurly jer» baǵdarlamasynyń sharapatyn kóredi. 800-den astam páterge konkýrs aıaqtalsa, qalǵan 620 páter boıynsha ótinishterdi qabyldaý qarasha aıynda bastalmaq. Olardyń deni «Saıaly» yqshamaýdanynda beriledi. 5 qabatty úılerdegi páterlerdiń aýmaǵy 29 ben 84 sharshy metr aralyǵynda.  

«Nurly jer» baǵdarlamasy boıynsha baspanaly bolý úshin úı baǵasynyń kem degende, 20 paıyzyn jınap nemese birden depozıtke aýdarý kerek. Beriletin nesıeniń jyldyq mólsherlemesi 5 paıyzdy quraıdy. Máselen, baǵasy 6 mıllıon 300 myń teńge bolatyn bir bólmeli páterdi satyp alý úshin banktegi depozıtke mıllıon 200 myń jınaý jetkilikti. Bul jaǵdaıda nesıe boıynsha aı saıynǵy tólem 52 myń 500 teńgege teń.

«2014 jyly «Turǵynúıqurylysjınaqbankinen» depozıt ashtyq. Sodan soń úsh jyldaı aqshamyzdy jınadyq. «Nurly jer» baǵdarlamasy boıynsha konkýrs bolyp jatqanyn estidik. «Baspana.kz» saıty arqyly ótinim berdik. Bankten habarlasyp, ótkenimizdi aıtty. Qujattarymyzdy jınap, úıimizdi aldyq. Úsh aı boldy turyp jatqanymyzǵa. Úılerdiń sapasy jaqsy», – deıdi Nurahmet Berdimuratov.

«Saıaly-2» yqshamaýdanynda boı kóterip jatqan úılerdiń qurylysy bitýge jaqyn. Qala shetinde salynyp jatqan baspanalar 10 baldyq zilzalaǵa tótep beredi ári qaýipsiz jerde ornalasqan deıdi mamandar. Bıyl boı kóteretin úılerge 11 mıllıard teńge qarjy bólinipti.

«Osy 2018 jyly Almatyda 121 úı salynyp jatyr. 443 myń sharshy metrdi quraıtyn 6 433 páter salynyp jatyr. Sonyń 68-i tapsyryldy, qalǵany jeltoqsan aıyna deıin tapsyrylady», – dedi Almaty qalasy Qurylys basqarmasy basshysynyń orynbasary Qýandyq Aıtmaǵambetov.

Keler jyly «Nurly jer» baǵdarlamasy boıynsha Alǵabas yqshamaýdanynda jańa úıler boı kóteretin bolsa, 2020-2021 jyldarǵa qaraı Almatyda «Saıaly-3», «Saıaly-4» yqshamaýdandary paıda bolady.

Byltyr osy baǵdarlama aıasynda Alataý aýdanynda 2 turǵyn úı kesheni boı kóterip, ondaǵy 650 salymshy qonys toılaryn toılady. Al bıyl 886 páter boıynsha qujattardy qabyldaý aıaqtalypty. Qarasha aıynda Saıaly yqshamaýdanynda 621 páterge ótinishter qabyldanady. Jaýaptylardyń málimetinshe, bir páterge 6 almatylyq úmitti.

«Nurly jer» baǵdarlamasymen úı alý úshin Qazaqstan azamaty bolýy kerek, Almaty qalasynda kem degende eki jyl tirkeýde bolýy tıis. Jáne óziniń, otbasy músheleriniń atynda úı bolmaýy qajet. Sońǵy bes jyl ishinde Qazaqstan boıynsha tekseriledi. Sondaı-aq, óziniń nesıe tóleý qabilettiligin dáleldeý qajet. Osy tórt talapqa sáıkes kelgen adam memlekettik «Nurly jer» baǵdarlamasy boıynsha úı ala alady», – dep túsindirip ótti «Turǵynúıqurylysjınaqbanki» AQ Almaty qalasy boıynsha tutynýshylarmen jumys júrgizý bóliminiń basshysy Danagúl Túsipova.

Al «Nurly jer» baǵdarlamasynyń talaptaryna saı kelmeı nemese ózi men otbasy múshelerinde jyljymaıtyn múlik bolsa, «Turǵynúıqurylysjınaqbankiniń» baǵdarlamasyna qatysýǵa múmkindik bar. «Óz úıim» jobasy boıynsha, páter qunynyń 20 paıyzyn jınasańyz, jyldyq mólsherlemesi 7 paıyzben baspana ala alasyz.