Aqyldylar oıyny. Almatyda «Nursultan Nazarbaevtyń Bilim berý qory» qoǵamdyq qorynyń 20 jyldyǵyna oraı shahmattan týrnır ótti.

Jarysta qor fılıaldarynyń stýdentteri men mektep oqýshylary baq synady. Saıysty Reseıden arnaıy kelgen qazaqstandyq shahmatshy, Halyqaralyq aqparattyq tehnologıalar ýnıversıtetiniń stýdenti Jansaıa Abdimálik ashty.  

«Búgingi jarysqa qonaq retinde keldim. Shahmat balanyń ıntellektisin, oı-órisin damytady. Sondyqtan týrnırge qatysýǵa 80-nen astam balalar men stýdentterdiń nıet bildirgeni qatty qýantty. Qazaqstanǵa bilimdi, aqyldy jastar kerek. Osyndaı shahmat týrnırleri aldaǵy ýaqytta dástúrge aınalady degen úmittemin», – dedi shahmattan álem chempıony Jansaıa Ábdimálik.

«Men ózim «Arystan» lıseıinde oqyǵandyqtan, áskerı bolǵandyqtan meniń bolashaqta áskerdegi josparlaryma, strategıalyq turǵyda kómek beredi. Men shahmatpen 6-synyptan beri aınalysyp kelemin. Búgingi jarysta Qordyń 20 jyldyǵymen quttyqtaı otyryp, óz komandama jeńis, qarsylastarǵa sáttilik tileımin», – dedi týrnırge qatysýshy Turar Qudaıbergen.

Saıysqa barlyǵy 82 adam qatyssa, eń kishkentaı oıynshynyń jasy 6-da. Jarys qorytyndysy boıynsha, ózgelerden oza shapqan Inovasıalyq tehnıkalyq kolejiniń stýdenti Alen Rahymjan 1-shi oryndy jeńip aldy.