Almatyda máslıhat depýtattyǵyna úmitker Asqat Shilikbaev Túrksib aýdanynyń turǵyndarymen kezdesti. Kandıdat aýdandaǵy bilim salasyn damytýǵa, mektep, balabaqshalar sanyn kóbeıtip, balalarǵa arnalǵan sport jáne óner ortalyqtarynyń salynýyna atsalyspaq. Áleýmettik az qamtylǵan, kóp balaly otbasylar men jalǵyzbasty analar da nazardan tys qalmaıdy dedi.  

«Turǵyndardy kóp mazalaıtyn suraqtyń biri – kóshelerdi jaryqtandyrý, mektep mańyna aıaldama salý jáne áleýmettik kómek. Búgin kóterilgen suraqtardyń bári de sheshiletin máseleler. Barlyǵyn ózime túrtip jazyp aldym», – dedi Almaty qalasy máslıhat depýtattyǵyna kandıdat Asqat Shilikbaev.

Túrksib aýdany turǵyndarynyń muń-muqtajyn máslıhat depýtattyǵyna kandıdat Gúlnas Ahmetova da tyńdady. Ata-analar mektepter mańaıyndaǵy joldardy jóndep, jaryq shamdar ornatyp, kóriktendirý jumystaryn júrgizýdi surady.  

«Aıtylǵan máselelerdiń kóbi áleýmettik suraqtar. Iaǵnı, turǵyndar sport alańdarynyń jetispeýshiligin, aýlalardy abattandyrýdy suraýda. Halyqtyń jeke máselelerin emes, kópshilikke qajetti nárselerdi suraǵany qýantady. Barlyǵyn da bolashaqta eskerýge tyrysamyz», – dedi Almaty qalasy máslıhat depýtattyǵyna kandıdat Gýlnas Ahmetova.

Máslıhat depýtattyǵyna úmitker Mıhaıl Grachevtan Túrksib aýdanynyń turǵyndary balalar alańyn kóbeıtip, keshki ýaqytta qatynaıtyn avtobýstardy qadaǵalaýdy surady. Kandıdat óz kezeginde halyqty saılaýaldy baǵdarlamasymen tanystyrdy. Úmitker aýdandaǵy aıaldamalardy jańartyp, shaǵyn jáne orta bızneske qolaıly jaǵdaı jasaýǵa at salysamyn dep sendirdi.  

«Turǵyndar kóbinese balalarǵa oıyn alańdaryn salýdy, kóshelerdi jaryqtandyrýdy suraıdy. Barlyq usynystardy eskeretin bolamyz. Jáne aýdannyń ınfraqurylymyn jaqsartyp, mektepke baratyn joldardy jaryqpen qamtamasyz etý josparymda bar», – dedi Almaty qalasy máslıhat depýtattyǵyna kandıdat Mıhaıl Grachev.