Jarty ǵasyrdan astam tarıhy bar «Selınnyı» kınoteatry 2020 jyly qaıta ashylady. Zamanaýı mádenıet ortalyǵy bolyp jumysyn bastaıtyn nysan osy ýaqytqa deıin túrli maqsatta jumys istep kelgen. Endi jaýaptylar ǵımarattyń rýhanı qundylyǵyn arttyrmaq nıette. Qarasha aıynda kúrdeli jumys bastalady, al oǵan deıin almatylyqtar men qala qonaqtary osy ǵımaratta oryn tepken keremet kórmeniń kýágeri bolady.  

Almatynyń injý-marjany sanalǵan «Selınnyı» kınoteatry óz zamanynda mıllıondaǵan kórermen jınaǵan. Bir mezette 1536 adam úlken ekranǵa kirip ketetindeı áser qaldyrǵan. Derekterge sensek, 82-shi jyly kınokórsetilimderdi 2 mıllıonnan astam adam tamashalapty. 1964 jyly tıptik joba arqyly salynǵan nysanǵa keńestik sáýletshi Vladımır Kasev ózgeris engizgen. Aıtpaqshy Vladımır Kasev sol ýaqytta Almatydaǵy aıshyqty nysandar: Almaty sırki, «Medeý» muz aıdyny, Balýan Sholaq sport kesheni boı kótergende, qurylystyń basy-qasynda júrgen negizgi mamandardyń biri bolǵan.

«Bul ǵımarat Máskeýden jiberilgen tıptik joba boıynsha salynǵan. Ony Qazaqstanǵa beıimdep salý meniń ákeme tapsyrylypty. Sodan bolar, ol óziniń dosyn, tanymal sýretshi Evgenıı Sıdorkındi shaqyrypty. Onyń qolynan myna ádemi sgraffıto shyqqan. «Selınnyı» úlken zaly bar iri kınoteatr bolatyn. Zalǵa lyq tolǵan halyqty kórgenim esimde», – dedi keńestik arhıtektor V.Kasevtiń qyzy Marıanna Pokrovskaıa.

Evgenıı Sıdorkınniń avtorlyq sgraffıtosy jóndeý jumystary kezinde tabylǵan. Ol 2000-shy jyldary joǵalǵan sýretterdiń qatarynda edi. Sol kezde úlken kınozal ekige bólindi, kireberisti jóndep, qosqabatty etip jasaǵan.

«Ǵımarattyń ońtústik jaǵynda atalmysh sgraffıtonyń kóshirmesi qoıylǵan. Biraq daıyndyq jumystaryn bastaǵan kezde Sıdorkınniń óz qolynan shyqqan týyndysyn tapqanda, qatty qýandyq. Josparymyzda bul pannony osy qalpynda saqtap qalý tur. Tipti, kem ketik jerlerin qalpyna keltirýimiz múmkin», – dedi «Selınnyı» zamanaýı mádenıet ortalyǵynyń» joba jetekshisi Jámılá Nurqalıeva.  

Sońǵy eki onjyldyqta bul ǵımarat qojaıynyn birneshe ret aýystyrǵan. Sáıkesinshe, árqaısysy ózindik ózgeristerdi alyp kelýge tyrysqan. Bul jerde meıramhana da, tipti túngi klýb ta óz ýaqytynda qyzmet atqarǵan. Endi zamanaýı mádenıet ortalyǵyndaǵylardyń aldynda turǵan basty mindet – ǵımarattyń rýhanı qundylyǵyn arttyryp, bastapqy keıpin qalpyna keltirý.

«Selınnyı» zamanaýı mádenıet ortalyǵy – Qazaqstandaǵy alǵashqy jobalardyń biri. Kúrdeli jóndeýdiń aldynda, qyrkúıekte munda úsh bólimnen turatyn «Bastaý» kórmesi óz jumysyn bastady. Burynǵy kınozalda «Ashyq arhıv: Almaty» ekspozısıasy qoıylǵan. Bul jerden qaladaǵy aıshyqty degen 20 ǵımarattyń sáýletimen, tarıhymen, taspaǵa túsken beınelermen tanysýǵa bolady. Al burynǵy túngi klýbtiń ornynda Ortalyq Azıa elderi sýretshileriniń týyndylary oryn tepken.

«Biz ǵımaratty barlyq sáýlettik qyrynan kórsetkimiz keldi. 64-shi jylǵy keıpinen bastap, túrli ózgeriske túsken kezeńderin qamtysaq deımiz. Artynsha tabylǵan sgraffıtony taýyp, ekinshi qabattyń baǵanalaryn qaldyrdyq. Ǵımarat paıdalanýǵa berilgennen bastap qandaı ózgeriske túskenin, qasbeti qalaı ózgergenin mynadaı syzbalarmen kórsettik», – deıdi kórme kýratory, arhıtektor (Máskeý) Ekaterına Golovatúk.

«Selınnyı» keńistigi keleshekte naǵyz mádenıet oshaǵy retinde paıdalanylady. Ony jobalaýmen brıtandyq sáletshi Asıf Han aınalyspaq. Nysan ámbebap baǵytta qyzmet etedi. Al basty mindet – kınoteatrdyń mádenı baǵyty men eski kelbetin qalpyna keltirý.