Almaty qalasynyń máslıhaty úsh depýtatpen tolyqty. Olar bosap qalǵan oryndarǵa talasqan bolatyn. Kandıdattardy saılaý 40 ýchaskede ótkizildi.
Saılaýǵa Jetisý jáne Túrksib aýdandarynyń 22 myńnan astam halqy qatysty. Naýqanǵa jalpy sany 9 adam, ıaǵnı ár okrýgten 3 kandıdattan talasqa tústi. Saılaýdyń nátıjesinde, №25 okrýgten Asqat Shilikbaev, al №34 okrýgten Gúlnas Ahmetova jáne №36 okrýgten Mıhaıl Grachev máslıhat depýttattary bolyp saılandy. Aıta keteıik, saılanǵan depýttattar joǵary bilimdi, basshy laýazymdarynda qyzmet etedi. Al qalǵandary 5 paıyzdan joǵary daýys jınaǵandyqtan saılaý jarnasyn qaıtaryp alýǵa quqyly.
«Daýys berýdiń qorytyndysy boıynsha mynandaı nátıje boldy. №25 okrýg boıynsha Shilikbaev Asqat Qashqynbaıuly 70,4 paıyz daýys jınady. Osymen ol saılaýda jeńiske jetip, depýtat atandy. Al №34 okrýg boıynsha Ahmetova Gúlnas Kenjetaıqyzy 73,3 paıyz daýys jınasa, №36 okrýgten Grachev Mıhaıl Vladımırovıch 72,8 paıyz daýysqa ıe boldy. Osylaısha, kóshbasshylar anyqtalyp, olar jaqyn arada jumysqa kirisedi», – dedi Almaty qalalyq Saılaý komısıasynyń tóraıymy Janna Asanova.
Eske sala keteıik, Almatyda 28 qazan kúni shyǵyp qalǵan jergilikti máslıhat depýtattary ornyna saılaý ótken bolatyn. Saılaý kezinde eshqandaı zańbuzýshylyq tirkelgen joq. Saıası dodanyń barysyn 300-deı baqylaýshy men depýtattyqqa úmitkerlerdiń senimdi ókilderi baqylady. Al saılaýda alǵash ret daýys bergen 18 jasqa tolǵandar men qarttarǵa syılyqtar úlestirildi. Sondaı-aq, tizimge ilinbeı qalǵandarǵa ár okrýgte turǵan halyqqa qyzmet kórsetý ókilderi kómektesti.
«Tań atpaı erte turyp, ózimniń konstıtýsıalyq quqyǵymdy negizge ala otyryp, tańdaý jasadym. Daýys berdim. Daýys berý árbir Qazaqstan azamatynyń mindeti dep bilemin. Búgingi turǵyndar saılaýǵa belsene atsalysýda. Elimizdiń órkendeýi úshin, rýhanı jańǵyrýy úshin árbir 18-ge tolǵan kámilettik jasqa tolǵan azamat pen eńkeıgen qartqa deıin daýys berýdi mindet sanaýy tıis dep bilemin», – dedi №84 jalpy bilim beretin mekteptiń bastaýysh synyp muǵalimi Adema Kokekova.
«Bizdiń jaǵdaıymyz jasalǵan. Barlyǵy jaqsy. Endi osy aýdanymyzǵa balalar oınaıtyn alań jasap beremin degen ýáde berildi, sol ýáde oryndalady degen senim bar. Kórshilerim óte jaqsy, uıymshyl. Bárimiz birge keldik. Daýys berip shyǵyp ketti ol kisiler», – dedi zeınetker Márzıa Atajanova.
