Almaty halyqaralyq áýejaıyndaǵy jańa termınaldyń qaı jerde salynatyny belgili boldy. Bul týraly búgin Túrksib aýdanynyń ákimi Pavel Kýlagın óńirlik komýnıkasıalar qyzmetinde ótken baspasóz máslıhaty barysynda aıtty.

«Áýejaı ǵımaratyn qaıta jańǵyrtýǵa kelsek, jaqynda ǵana onyń basshylyǵy aýysty. Qazirgi tańda eskızdik jobaǵa halyqaralyq baıqaý jarıalandy. Meniń oıymsha, jaqyn arada atalǵan jobanyń jeńimpazy belgili bolady. Ony jaqyn arada BAQ ókilderine tanystyramyz», - dedi Pavel Kýlagın óńirlik komýnıkasıalar qyzmetinde ótken baspasóz máslıhatynda.

Onyń aıtýynsha, qolǵa alynatyn jobany júzege asyrý úshin jer telimi de bólinip qoıǵan.

«Aımaq qorshaýǵa alynyp, qurylysqa daıyndalyp jatyr. Atalǵan terıtorıanyń topyraǵy shyǵaryldy. Áýejaıdan ońǵa taman Zakarpatskaıa kóshesindegi bos oryn bar»,- dedi ákim.

Aıta ketý kerek, osydan birneshe apta buryn áýejaı ókilderi jańa termınal týraly baıandaǵan bolatyn. Osyǵan deıin Almaty áýejaıynyń basshylyǵy jańa termınaldyń ótkizý qabiletin arttyrýdyń birneshe joly týraly aıtty.