Ápkeleriniń qazasy sińlilerine de áser etken. «İnjýimniń óliminen keıin eki qyzym qatty kúızeliske túsip ketti», - deıdi Dınara Baımaǵambetova. Balalardyń jaǵdaıy qalaı? Bútin bir otbasynyń balalaryn aınaldyrǵan ne syrqat? Bul týraly Eýrazıa birinshi arnasy habarlaıdy.

Qyzynyń qazasynan keıin áli es jınap úlgermegen Dınara aýrýhanamen eki ortada shapqylap júrgenin aıtady. 2 jasar Tarǵyny men 4 jastaǵy Nurbaqyty aýrýhanaǵa túsip qalypty. Qazir nevrologıa bóliminde jatyr eken. Balalardyń syrqatyna İnjýdiń ólimi qatty áser etti dep otyr.

«Nurbaqyt İnjýden keıin kúızeliske ushyrady. Jylap, túnde meni uryp, «İnjýdi alyp kel, ol tiri, tiri» dep qoımaıdy. Turyp jylaı beredi», - deıdi marqumnyń anasy Dınara Baımaǵambetova.

Tarǵyn men Nurbaqyt qazir qalalyq balalar klınıkalyq aýrýhanasynda em qabyldap jatyr. Olarmen júzdesýge aýrýhana basshylyǵy ruqsat etpedi. Balalarǵa ákesi bas-kóz bolyp otyr eken.

Dárigerler balalardyń jaǵdaıy ortasha deıdi. Ekeýiniń de qany az. Úıde aıaq-qoldary qurysyp, tartylyp qalǵan. Aq halattylar oǵan ne sebep bolǵanyn áli anyqtaı almaı otyr. 

«Balalardy bizge ýchaskelik nevropatolog jibergen. Ekeýiniń de aıaq-qoly tartylyp, talmasy ustaǵan. Biraq bizge túskeli ondaı belgiler baıqalmady. Ázir baqylaımyz. Tıisti em-domyn jasap jatyrmyz», - deıdi Natalá Golovyrına.

♦Jedel járdem 40 mınýtta kelemin degenshe kishkentaı qyz óldi

Esterińizge salsaq, osydan eki apta buryn 7 jastaǵy İnjý Jankına jedel járdem kútip jatyp, kóz jumǵan edi. Jetkinshektiń anasy buǵan keshigip jetken dárigerlerdi kinálady. Keıin oblystyq densaýlyq saqtaý basqarmasy jedel járdemniń 49 mınýtqa keshigip jetkenin rastady. Al oqýshy qyzdyń "mehanıkalyq asfıksıadan" qaıtys bolǵany belgili boldy. Qazir bolǵan oqıǵaǵa qatysty táýelsiz komısıa tekserý júrgizip jatyr.