Shymyldyq syrtyndaǵy shytyrman oqıǵa! Aqtaýda oblystyq drama teatrdyń aktrısasy mádenıet oshaǵynyń basshysyn qyzmetkerlerin jynystyq qatynasqa májbúrleıdi dep aıyptady.

Basty róldi akterlik sheberlik emes, tósektegi “óneri” úshin beredi degen aktrısa burynǵy jumys ornyn “jezóksheler mekeni” dep atady dep habarlaıdy KTK arnasy. Teatr basshylyǵy árıne ózderine shań jýytqan joq. Endi taraptar máseleni sotta sheshpek. Klasıkalyq janjal, drama, tragedıa jáne shytyrman oqıǵa. Munyń bári Mańǵystaý drama teatrynyń sahnasynda emes, syrtynda órbip jatyr. Dına Ahmetjan óner ordasynda 11 jyl eńbek etipti. Sodan bergi ishinde saqtap júrgen syryn qazir ashyp otyr. Aıtýynsha, teatr dırektory birneshe jyldan beri sóz salypty. Aktrısa bastyǵyna ashyna bolýdan bas tartyp, jumystan qaǵylǵan kórinedi.

Maǵan basshy ashyqtan-ashyq, meniń kóńilimnen shyǵýyń kerek, ıaǵnı tósektes bol dedi. Kelisken joqpyn

“Maǵan basshy ashyqtan-ashyq, meniń kóńilimnen shyǵýyń kerek, ıaǵnı tósektes bol dedi. Kelisken joqpyn. Sosyn meniń kim ekenimdi bilesiń be, bári meni jaqtaıdy, seni bir-aq kúnde qýyp jiberemin dep aıtty”, – deıdi aktrısa Dına Ahmetjan. Al bul máseleniń ýshyǵýyna dırektordyń kóńildes bolýǵa jasaǵan usynysy emes, baspana jaıy sebep bolyp tur. Dınanyń óz úıi bolmaǵan. Qyzmettik páter alýy kerek eken. Ótken jyly oǵan teatr baspana satyp alyp beripti. Biraq 700 myń teńgesin ózine tóletken. Sodan soń, jumystan shyǵara salypty. “Bul jerde dırektor Nurnıaz Muqanov pen teatr rejıseri Gúlsına Mırǵalıeva páterdi ıaǵnı tek ózi jaqsy kóretin adamdaryna ǵana beredi. Kóńilinen shyqqan adamdar ataq, páter alady”, – dedi Dına Ahmetjan.

Sóıtip, teatr páterin de bermegen, tólegen aqshasyn da qaıtarmapty. Ómir spektakliniń bulaısha bitýine qarsylyq tanytqan aktrısa, jumystan zańsyz shyǵardy dep sotqa aryz jazǵan. Alaıda jeńilip qaldy.

“Qaralaý deıtin bolady. Akter men aktrısalar meni áke deıdi. Solardan qalǵan balalar nemerem. Buny aıtýdyń ózi uıat”, – dep otyr Nurmahan Jantórın atyndaǵy drama teatrynyń dırektory Nurnıaz Muqanov. Ózderine las aıyp taqqanyna qaramastan teatr ujymy burynǵy áriptesiniń ónerin joǵary baǵalaıdy. Rejıserdiń sózine sensek, ol ártistik sheberligin sahnadan tys kezde de qoldanady eken. “Ol meniń kınoma tústi. Aıaıtynmyn. Bir kezderi kúıeýimen ajyrasyp júrdi. Oǵan basty rólderdi aıamaı berdim. Qyz Jibekti, Baıan sulýdy oınady. Adamnyń aıaýshylyǵyn týdyra alatyn aktrısa bolyp tur ǵoı. Tipti kúlkili eken”, – deıdi Nurmahan Jantórın atyndaǵy drama teatrynyń rejıseri Gúlsına Mırǵalıeva. Endi qos tarap sotta kezdesetin boldy. Dına Ahmetjan baspana men aqshasyn qaıtaryp alýǵa talpynyp jatyr. Al teatr dırektory burynǵy qyzmetkerin jala japqany úshin jazasyn bermek.