«Qazaq tili álipbıin latyn grafıkasyna 2025 jylǵa deıin kezeń-kezeńimen kóshirý jónindegi is-sharalar josparyna» sáıkes 14 qarasha kúni respýblıka boıynsha jalpyhalyqtyq dıktant ótedi. Sharanyń maqsaty –latynnegizdi qazaq tili álipbıin, emle erejelerin meńgerý, oǵan beıimdelý jáne tildi meńgerýge degen qyzyǵýshylyqty arttyrý.

Dıktan jazýdyń aldynda 15 mınýt buryn tyńdaýshylarǵa latynnegizdi qazaq álipbıi men onyń emlesi tanystyrylady jáne jańa álipbı nusqasy, arnaıy jazý paraqtary taratylady. Mańǵystaý oblystyq tilderdi damytý, arhıvter men qujattama basqarmasy málimetinshe, dıktant mátini aýdıoqurylǵydan úsh ret dybystalady. Dybystalý jyldamdyǵy til meńgerý deńgeıiniń talabyna saı. Qatysýshylar mátindi birinshi ret oqyǵanda muqıat tyńdap, ekinshi ret oqyǵanda jazýy kerek. Odan soń qatesin tekserý úshin mátin taǵy bir ret oqylady. Árbir dybystalý aralyǵynda úzilis bolady.

Dıktant respýblıka boıynsha bir kúnde, bir ýaqytta jazylady. Bekitilgen mátin (80-90 sóz) aýdıojazbasynyń uzaqtyǵy 30 mınýt. Respýblıkalyq sharaǵa Mańǵystaýdan 80 myń adam qatysady dep josparlanǵan.

Dıktant jazýǵa 15 jastan asqan barlyq azamat qatysa alady. Qatysýshylar ózderimen qalamsaptaryn alyp kelýi tıis.

Belgilengen oryndarǵa kelip qatysa almaıtyn tulǵalar dıktantty emle.kz, tilalemi.kz saıttarynyń basty betinde ornalasqan siltememen kompúter nemese uıaly telefon (smartfon) arqyly kirip, belgilengen ýaqytta dıktant aýdıosyn tyńdaı otyryp jaza alady.

Dıktantty jazyp bolǵan soń skanerleý nemese fotoǵa túsirý arqyly tilalemi.kz@gmail.com elektrondyq poshtaǵa joldaýy qajet. Sondaı-aq dıktant aıaqtalǵan soń atalǵan saıtta dıktanttyń durys nusqasy men dıktantty baǵalaý ólshemsharttary shyǵady. Árbir paıdalanýshy jumysyn durys nusqamen salystyra otyryp, ólshemsharttarǵa sáıkes ózin-ózi baǵalaı alady.

Arnaıy qurylǵan jumys toptary dıktant qorytyndysyn shyǵaryp, 5 kúntizbelik kún ishinde statıkasyn jarıalaıdy.