Aqtaý qalasynda Qazaqstan Respýblıkasynyń Parlamenti Senaty men Reseı Federasıasy Federaldyq Jınalysy Federasıa Keńesiniń Yntymaqtastyq jónindegi komısıasynyń 13-shi otyrysy ótti. Otyrysqa Iran delegasıasy da qatysty.
Sharany Senat Tóraǵasynyń orynbasary Sergeı Gromov ashyp, Kaspıı teńiziniń quqyqtyq mártebesi týraly konvensıaǵa qol qoıylǵan Kaspıı mańy memleketteri basshylarynyń Aqtaý samıtiniń qorytyndylaryn Astana joǵary baǵalaıtynyn sózine tıek etti.
Senat Tóraǵasynyń orynbasary osynaý erekshe qujatqa qol qoıý jónindegi kelisimge kelýdegi Reseı men Irannyń úlesin joǵary baǵalady. «Bul bárimiz úshin zor jetistik dep sanaımyn. Búgingi otyrys bizdiń elderimiz basshylarynyń tilegin ómirge engizý», - dedi ol. S.Gromov Konvensıaǵa qol qoıylýy osynaý erekshe sý aıdynyna ekijaqty deńgeıde de, kóptarapty sıpatta da beıbitshilik pen ózara tıimdi yntymaqtastyq aımaǵy mártebesin bekitýge múmkindik beretinin atap ótti. «Endi Konvensıany uzaqqa sozbaı, bizdiń parlamentterimizdiń ratıfıkasıalaǵany mańyzdy bolyp otyr. Bıylǵy 6 qarashada Konvensıany ratıfıkasıalaý jónindegi qujattar toptamasy Qazaqstan Respýblıkasynyń Úkimetinde qaralǵanyn habarlaımyn. Konvensıany ratıfıkasıalaý týraly zań jobasyn Úkimet aldaǵy ýaqytta Parlament Májilisine beredi dep kútip otyrmyz», - dedi S.Gromov.
Mańǵystaý oblysy ákimi baspasóz qyzmetiniń málimetinshe, otyrys barysynda eki eldiń senatorlary Biryńǵaı ekonomıkalyq keńistik aıasynda Mańǵystaý oblysy men Reseıdiń Daǵystan Respýblıkasyn mysal ete otyryp, shekaralyq aımaqtardy damytýdy, Kaspııdegi týrızm, ekologıa men bıoresýrstardy qorǵaý salasyndaǵy yntymaqtastyqty damytý máselelerin talqylady.
Konvensıa teńizdegi quqyqtar men egemendiktiń arajigin ajyratýǵa, qoınaýyn paıdalaný, tranzıt pen tasymaldaýquqyqtaryn júzege asyrýǵa, sý asty qubyrlary men jelilerdi júrgizýge, tarıǵı orta men bıologıalyq resýrstardy qorǵaýǵa baılanysty aýqymdy máselelerdi qamtıdy.
Sóz alǵan Reseı Federasıasy Federasıa Keńesi Agrarlyq-azyq-túlik saıasaty jáne tabıǵatty paıdalaný komıteti tóraǵasynyń orynbasary Sergeı Beloýsov jáne Iran Islam Konsýltatıvtik Keńesi Tóraǵasynyń birinshi orynbasary Masýd Pezeshkıan Konvensıany ýaqytynda ratıfıkasıalaýdyń mańyzy týraly aıtty.
S.Gromov pen Iran Islam Konsýltatıvtik Keńesi Tóraǵasynyń birinshi orynbasary Masýd Pezeshkıannyń kezdesýinde parlamentaralyq yntymaqtastyq jáne ekijaqty qatynastardy, onyń ishinde parlamentaralyq únqatysýlardy odan ári nyǵaıtý máseleleri talqylandy.
Otyrysqa senatorlar Jeńis Nurǵalıev, Olga Perepechına, Mıhaıl Bortnık, Ǵumar Dúısembaev jáne Baqtybaı Shelpekov qatysty
