Taqtaısha ázirge qaladaǵy kóp qabatty alty turǵyn úıge ornatylǵan. Bul jóninde Aqtaý qalasynyń ákimdiginde «Sıfrly Qazaqstan» memlekettik baǵdarlamasy aıasynda atqarylǵan jumystar jóninde ótken brıfıńte aıtyldy.

QR-kody bar taqtaıshalardyń ereksheligi – turǵyn úı týraly barlyq málimetti bilýge múmkindik berýinde. PIK (Páter ıeleri kooperatıvi) týraly aqparat jáne dıspecherlik qyzmet, elektrık, santehnık, polısıa pýnktiniń baılanys nómirleri de qamtylǵan.

Uıaly telefonyńyzda QR-kodty oqıtyn mobıldi qosymshańyz bolsa bolǵany. Aqparattardy osy qosymshanyń kamerasyn QR-kodqa baǵyttaý arqyly kóre alamyz. Al «iphone» uıaly telefonyn paıdalanatyndar qosymshany júktemeı-aq telefonnyń kamerasyn qoldanýyna bolady.

Taqtaıshada turǵyn úı týraly málimetten bólek úıdiń poshtalyq ındeksi men post.kz saıtyna silteme kórsetilgen. Bul kýrerlerdiń, poshta qyzmetiniń jumysyn jeńildetýge, turǵyndardyń ǵalamtor arqyly tapsyrys berýine jaǵdaı jasaıdy. Silteme arqyly komýnaldyq tólemder men aıyppuldardy tóleýge múmkindik bar. Aryz-shaǵymdar men usynystar da osy kodtar arqyly qabyldanbaq.

Aıta keteıik, taqtaıshalar aldaǵy ýaqytta qaladaǵy basqa da turǵyn úılerge qoıylmaq.