Almaty qalasynyń Medeý aýdanyndaǵy Esenov kóshesiniń boıynda ornalasqan №15-shi bes qabatty turǵyn úıdiń shatyrynan órt shyqty. Bul týraly Almaty qalalyq Tótenshe jaǵdaılar departamentiniń baspasóz hatshysy Nurbek Qojahmet habarlady.

Onyń aıtýynsha, TJ departamentiniń “101” kezekshi bólimine órt týraly habar saǵat 20.06-da kelip túsken. “Artynsha, barlyq órt sóndirý bólimderi oqıǵa ornyna jóneltildi. Onda saǵat 20.15-te órt sóndirýshilerdiń alǵashqy bólimshesi kelip jetti. Tilsiz jaý saǵat 21.24-te aýyzdyqtalyp, saǵat 22-ler shamasynda tolyǵymen sóndirildi. Ony joıýǵa 12 negizgi jáne 10 arnaıy tehnıka men jeke quramnyń 90 adamy jumyldyryldy. Órttiń aýmaǵy 1000 sharshy metr jerdi qurady. Oqıǵa ornynan qaýipsiz aýmaqqa 200-ge tarta adam kóshirildi. Qurban bolǵandar men zardap shekkender joq. Qazir órttiń shyǵý sebepteri anyqtalý ústinde”, – dedi Nurbek Qojahmet. Aıta ketelik, qazir Medeý aýdanynyń ákimdigi adamdardy ýaqytsha baspanamen jáne ystyq tamaqpen qamtamasyz etýge kúsh salýda.