Sút úshin mıllıon teńge qaryz! Aqtóbe mańyndaǵy aýyl turǵyndary kásipkerden aqshalaryn ala almaı júrgenin aıtyp, arnamyzǵa shaǵymdandy deıdi Eýrazıa birinshi arnasy. Olar jaz boıy aýyl sharýashylyǵy kooperatıvine sút tapsyrǵan eken.  Al seriktestik basshylary tamyzdan beri qaryzdy tólemeı, tek qurǵaq ýádege toıdyryp kele jatyr deıdi. Turǵyndar bylaı tursyn, ákim-qaralardyń sózine qulaq túrmeıtin kásipker kim? Bul týraly Eýrazıa birinshi arnasy sújet jasapty.

«Qarataýsaıdyń turǵyndary qorasyndaǵy tórt túliktiń etimen, sútimen kún kórip otyr. Sútti qabyldaıtyn jeke kásiporynmen aýyldyqtar ótken jyly baılanysypty. Súttiń lıtrin 85 teńgege tapsyrýǵa kelisken. Kúnine ár adam orta eseppen 40 lıtr aǵarǵan berip otyrdyq deıdi. Bastapqyda bári kelisimsharttaǵydaı keremet bolǵan. Tek tamyz aıynan bastap mekemeniń jumysy suıyla bastaǵanyn aıtady. Sodan beri aýyldyqtar ózine tıesili aqshany alýdan qalypty. 

Kopperatıv ár otbasyǵa ortasha eseppen qyryq myńnan, jetpis myń, tipti keıbirine júz myń teńgeden qaryzǵa batqan. Biraq, mán-jaıdy túsindiretin eshkim joq. 

“Maǵan 100 myń teńgeden asa bereshek. Ózimizge tıesili aqshany bermeı júr. Keńsesine telefon shalsaq, osynda júr deıdi, shaqyr telefonǵa desek, shyǵyp ketti deıdi. Bizde basqa jumys joq! Sol súttiń aqshasymen kún kórip otyrmyz ǵoı! Endi qaıtemiz?!”,-deıdi Qarataýsaı aýylynyń turǵyny Sapýra Orazova.

«524 lıtr sútti 85 teńgeden tapsyrdym. Endi ózińiz sanaı berińiz, meniń ózime 44 myńnan asyp ketti qaryzdary. Bizge ǵana bereshek emes, surastyryp bilip edik, kórshi Komınterin, Kazankadaǵylar da sútti qabyldap alyp, aqshasyn bermedi dep shýlap otyr” – deıdi Qarataýsaı aýylynyń turǵyny Lıdıa Prohorova.

Aýyldyqtardyń janaıqaıynan jergilikti bılik te habardar. Al, aýdan ákimdigi kásipkerden qaryzdy 6-qarashada tolyq óteımin degen qolhat alypty.

«Aýdan ákimdigimen birlesip jumys jasap jatyrmyz. Osy máseleni sheshýge tyrysamyz. Kelesi aptada osy fırmanyń adamdary barlyq qaryzdardy tólep tastaımyz degen ýáde berdi», - deıdi Mártók aýdany Qarashaı aýyldyq okrýginiń ákimi Nurgúl Ospanova.

Kásipker qazir aýyl  turǵyndaryna 1 mln 300 myń teńge bereshek. Qaryzynan qashan qutylatynyn ózi dóp basyp aıta almady. 

«6 qarashada tóleımiz dep ýáde etip edik, oǵan úlgermedik. 21-qarashaǵa deıin ýaqytty sozdyryp aldyq. Aqsha bolmaı tur shotta. Qashan qarajat túsedi, sol kezde qaryzdan qutylamyz” – deıdi kásipker Álıma Qojıeva.

Al, ýádege toıǵan jurt eger bir aptanyń ishinde nátıje bolmasa, quqyq qorǵaý oryndaryna shaǵymdanamyz dep otyr.