Túbekte tuńǵysh ret uıymdastyrylǵan bokstan erler arasyndaǵy QR chempıonaty óz máresine jetti. Esimderi elge tanys boksshylardyń sharshy alańdaǵy sheberligine kýá bolyp, ekiniń birine buıyra bermeıtin týrnırdi óz kózimen tamashalaǵan jergilikti halyqtyń qýanyshynda shek joq. Jeti kún boıy Mańǵystaý Arena kesheni kórermenge lyq tolyp, jastardyń rýhyn jigerlendirgen jarys bolǵany anyq.
Týrnır qorytyndysy boıynsha, komandalyq emepte birinshi oryndy 2 altyn, 3 kúmis jáne 2 qola medalmen Túrkistan oblysy, ekinshi oryndy bir altyn, úsh kúmis jáne tórt qola medalmen Mańǵystaý, al úshinshi oryndy Jambyl oblysy 1 altyn, 2 kúmis jáne úsh qola medalmen qorytyndylady.
Aıtýly sharaǵa elimizdiń 14 oblysy men 3 respýblıkalyq mańyzy bar qaladan barlyǵy 206 sportshy qatysty. Qatysýshylardyń qatarynda álemdik arenalarda top jaryp júrgen Qaırat Eralıev, Vasılıı Levıt, Ábilhan Amanqul, Aslanbek Shymbergenov, Bekdáýlet Ibragımov, Abylaıhan Júsipov, Temirtas Júsipov, Ilás Súleımenov, Erik Áljanov, aǵaıyndy Tóltaevtar bar. Júzden júırik shyqqandar keler jyly ótetin Azıa jáne Álem chempıonattarynda baq synaıtyn bolady.
Jabylý saltanatyn sóz alǵan oblys ákimi Eraly Toǵjanov týrnırdiń joǵary deńgeıde ótýine at salysyp, qoldaý kórsetken Qazaqstan Boks Federasıasynyń basshylyǵyna alǵysyn aıtyp, jarystyń qurmetti qonaǵy Ermahan Ybraıymov, Baqtıar Artaev, Bolat Jumadilov, Baýyrjan Ospanov, Myrzaǵalı Aıtjanov, Marat Mázimbaev, Mereı Aqshalov, Birjan Jaqyp, Nurjan Kárimjanovqa Mańǵystaý halqynyń atynan rızashylyǵyn bildirdi. Sondaı-aq, "Sport salasy qashanda elbasymyz Nursultan Ábishulynyń basty nazarynda. Tipti halyqqa arnaǵan ár joldaýynda da otandyq sportty damytý jáne salaýatty ómir saltyn nasıhattaýǵa basymdyq bere otyryp, aldymyzǵa naqty tapsyrmalar qoıǵan bolatyn. Sebebi, búgingi jas sportshylar – erteńgi eldiń myqty azamattary men el mereıin asqaqtatatyn chempıondar. Tynymsyz ter tógip, aıanbaı eńbek etken elimizdiń sportshylarynyń týǵan elimizdiń dańqyn asyryp, jańa bıikterdi baǵyndyra berýlerińe shyn júrekten tilektespin" dedi aımaq basshysy.
Sonymen qatar, saltanatty sharada eki birdeı Olımpıada oıyndary men Álem chempıonattarynyń eki dúrkin kúmis júldegeri, Azıa oıyndarynyń chempıony, Ádilbek Nıazymbetov úlken sporttaǵy karerasyn aıaqtaǵan málimdedi.
Kópshilik aldynda boksshymyzǵa qurmet kórsetilip, halyq zor qoshemetpen shyǵaryp saldy. Ádilbek baýyrymyzdyń otandyq boks aldynda sińirgen eńbegi orasan zor. Eki birdeı Olımpıadanyń júldegeri ataný kez kelgen sportshynyń qolynan kelmeıdi. Sondyqtan Ádilbek aldaǵy ýaqytta tek jańa belesterdi baǵyndyrady dep senemiz jáne sporttyq ǵumyryndaǵy tájirıbesin óskeleń urpaqqa, táýelsiz elimizdiń órkendeýine baǵyttaıtynyna esh kúmánimiz joq dedi, oblys ákimi Eraly Toǵjanov. Mańǵystaýdyń taǵy bir batyr uly, halyqaralyq dárejedegi sport sheberi, bokstan Azıa chempıony, Álem chempıonatynyń qola júldegeri, birneshe dúrkin el chempıony, Berik Abdrahmanov ta bylǵary qolǵabyn shegege ilip, sharshy alańdaǵy ornyn keıingi jastarǵa amanattady. Aldaǵy jospary shákirt tárbıelep, Mańǵystaý boks mektebiniń damýyna óz úlesimdi qossam deıdi.
