Almatyda, Jambyl atyndaǵy kitaphanada «Mahabbattyń máni» atty kitaptyń tusaýkeseri ótti. Oǵan BAQ ókilderi, qoǵam qaıratkerleri men kitaptyń mazmunyna qyzyqqan oqyrman qaýym jınaldy. At terlertip Qazaqstannyń shalǵaı óńirlerinen arnaıy kitaptyń tusaýkeserine kelgender boldy.

Joba avtory Sanjar Kerimbaı onshaqty kitaptyń eskızi syzylyp, kezek kúttirmeıtin taqyryptar anyqtalyp qoıǵanyn, biraq «mahabbattyń máni týraly jazýymyz kerek» degen másele alǵa shyǵyp ketkenin aıtady.

- Psıholog, psıhıatr  Vıktor Frankldyń ózi «Erkindiktiń máni», «Ólimniń máni» dep jazyp keledi de, «Mahabbattyń mánine» kelgende tabandap turyp 55 bet tek soǵan arnaıdy, - dep mahabbattyń túsindirmesiniń qoǵam úshin mańyzdylyǵyn túsindiredi Sanjar Kerimbaı.

Kitaptyń ataýyna qarap, ádettegi kóz úırengen, kitap dúken sórelerinde tolyp turǵan «Qyzdy qaratýdyń 99 tásili», «Kúıeýińmen jaqsy qarym-qatynas ornatýdyń 10 joly» sekildi kitaptyń bir túri eken dep oılap qalýyńyz múmkin. Alaıda onda ǵylymı zertteý men mahabbatqa qatysty máselelerdiń sebebine emes, negizine kóńil bóledi. Onda qalaı emes, nege degen suraqqa jaýap izdeıdi.

 «Mahabbattyń máni» kitabyn qurastyrýshylarynyń biri fılolog, magıstr Sáken  Nuqabekulynyń aıtýynsha, ǵalym, oıshylardyń mahabbattyń máni týraly jazǵan materıaldaryn izdeý, zertteý qıynǵa soqqanyn aıtady.

- «Mahabbattyń máni» týraly jazamyz «degende,  mahabbat týraly taqyryp kóp. Sony jınap bersek boldy dep oıladym. Aqyndar tek mahabbatty jyrlaǵan sekildi, ánshilerdiń barlyǵy derlik mahabbat týraly án aıtatyn sekildi kórindi. Naqty akademıalyq fýndamentaldy ǵylymǵa kelgen kezde bul taqyrypty nysan retinde tańdaǵan ǵalymdar óte az bolyp shyqty. Ǵalymdardyń, oıshyldardyń zertteýin saralaýǵa týra keldi, - deıdi Sáken Nurqabekuly.

Joba avtory Sanjar Kerimbaıdyń aıtýynsha, Sáken Nurqabekuly kitaptyń 65-70% jumysyn atqarǵan. Turaqty kirisi bar jumysyn ysyryp qoıyp, atalmysh kitaptyń jumysyna bilek sybana kirisken. Onyń ishinde Batys ǵalymdarynyń zertteýin saralap shyqqan.

Odan bólek kitaptyń shyǵýyna atsalysqandar – Ádilbek Nábı, dintanýshy magıstr, Muhıt Tólegen, dintanýshy PHD doktory.

Qurastyrýshylardyń aıtýynsha, kitapta ajyrasý, zorlyq, neke, nekesiz bala, mahabbat, túsik, sábıdi qoqysqa tastaý sekildi birqatar máseleler kóteriledi. Onyń shyǵý sebebi nede ekenine jaýap izdeıdi. Kitapta tarıhı derekter, statısıkalyq málimetter kezdesedi. Munyń barlyǵy ekzıstensıa ádisimen taldanǵan.