Jambyl oblysy ákimdigi ishki saıasat basqarmasy «Óńirlik komýnıkasıalar qyzmetiniń» alańynda «ULYS» sıfrlyq jýrnalynyń Bas redaktory Erjan Qalymbaıulynyń qatysýymen baspasóz konferensıasy ótti. Spıkerler «ULYS» sıfrlyq jýrnaly týraly baıandap, jýrnalıserdiń suraqtaryna jaýap berdi.
5-qyrkúıek kúni Alashtyń ardaqtysy, qazaqtyń taý tulǵasy — Ahmet Baıtursynulynyń týǵan kúni qarsańynda «ULYS» atty Qazaqstannyń tuńǵysh sıfrlyq jýrnalynyń tanystyrylymy ótken bolatyn. Baǵyty — saraptamalyq, tanymdyq. Zamanaýı, joǵary estetıkalyq talǵammen jasalǵan jobany iOS jáne android júıelerindegi qosymsha arqyly telefonǵa nemese Ipadtarǵa tegin júktep alyp, oqýǵa bolady. Mýltımedıalyq jýrnal zaman talabyna saı sıfrlyq negizde jasalǵan. Búgingi oqyrmandardyń talǵamyna saı zamanaýı tehnologıaǵa negizdelip joǵary estetıkalyq turǵyda kórkem bezendirilgen. Kóptegen taqyryptarǵa utymdy speseffektiler qoldanylǵan. Maqalalardy tek oqyp qana qoımaı, tyńdaýǵa hám suhbattardy kórýge de bolady. Qazaqstannyń aqparattyq naryǵyn sapaly kontentpen qamtamasyz etýge úles qosatyn joba. Mundaǵy saraptamalyq, tanymdyq maqalalar san salany qamtıdy. Geostrategıa, geoekonomıka, geosaıasat, halyqaralyq qatynastar men eldiń ishki-syrtqy saıasaty, ekonomıka, jahanda bolyp jatqan tektonıkalyq ózgerister men trend taqyryptar ulttyq múdde turǵysynan tereń taldanyp qazaq oqyrmandaryna jetkiziledi.
Ortalyq Azıa men Túrki álemine erekshe kóńil bólinedi. Aıyna bir ret tek qazaq tilinde ǵana shyǵatyn jýrnaldyń birinshi betine ózindik aıtar oıy bar, jeti eldiń tilin, jeti túrli bilim biletin jalyndy jandar, ásirese jastar shyǵady. Bir jaǵy oıly, bilimdi hám aqyldy jastardy «sánge» aınaldyrý. Sonymen qatar, jýrnal aıasynda qazaqtildi jas sarapshylardyń jańa tolqynyn qalyptastyrýǵa yqpal etý. «ULYS» saraptamalyq, tanymdyq jýrnalyn Ortalyq Azıa jáne Túrki álemi sarapshylarynyń aqyl-oı alańyna aınaldyrý da maqsatta bar. Qyrǵyzsha maqalany qyrǵyzsha, ózbeksheni ózbekshe berý arqyly baýyrlas elder arasyndaǵy rýhanı ıntegrasıany kúsheıtý de negizgi oılarymyzdyń biri.
