Maqtaaral aýdanynyń aparattyq májilisinde «Sıfrlyq Qazaqstan» memlekettik baǵdarlamasynyń jergilikti jerde oryndalýy men aldaǵy ýaqytta baǵdarlama boıynsha iske asyrylatyn josparlar, jobalar jáne turǵyndarǵa memlekettik organdar tarapynan kórsetilgen qyzmetter boıynsha atqarylǵan jumystardyń barysy tyńdaldy.
Baıandama jasaǵan aýdan ákimi apparatynyń aqparattandyrý, memlekettik qupıalardy qorǵaý jáne memlekettik qyzmet kórsetý monıtorıńi bóliminiń basshysy Erlan Turymbetov aýdan ákimdiginiń derbes bólimderi, kentter men aýyldyq okrýgterde QR Úkimetiniń «Memlekettik kórsetiletin qyzmetterdiń tizilimine» sáıkes, 97 qyzmet túri kórsetilgenin atap ótti.
Bólim basshysy 2018 jyldyń 9 aıynda 90627 memlekettik qyzmet kórsetilgenin aıtty. Onyń ishinde qaǵaz júzinde, tikeleı – 19075 qyzmet, halyqqa qyzmet kórsetý arqyly – 29400 qyzmet kórsetilgen. Sondaı-aq, elektrondy úkimettiń portaly arqyly jalpy sany 42152 qyzmet kórsetilip, aýdanda elektrondy qyzmet kórsetý úlesi 46,5%-dy ǵana quraǵan.
Aýdan ákimdigine qarasty derbes bólimder, kentter men aýyldyq okrýgteri ákimderi apparattarynyń ǵımarattarynda turǵyndardyń «Ózine-ózi qyzmet kórsetý» buryshtary ashylǵan. Osy buryshtarda azamattar ózine qajetti qyzmetti alý múmkindikteri bar. Jergilikti atqarýshy organdar tarapynan usynylatyn qyzmetterdi «Sıfrlyq Qazaqstan» memlekettik baǵdarlamasy aıasynda elektrondy formatqa kóshirý maqsatynda, memlekettik kórsetiletin qyzmetterdiń elektrondy túrde kórsetý múmkindikterin eldi mekenderde turǵyndarǵa aqparattyq-nasıhattap, túsindirý jumystaryn júrgizý qajettigin de bólim basshysy eske saldy.
«Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty halyqqa arnaǵan Joldaýynda «Jalpy, 2019 jyly kórsetiletin memekettik qyzmetterdiń 80 paıyzy, al 2020 jyly keminde 90 paıyzy elektrondy formatqa kóshirilýge tıis» dep aıqyndaǵan. Maqtaaral aýdanynda bul mejeni oryndaý úshin kóptegen jumystardy atqarý kerek» - dedi E.Turymbetov.
Aýdan ákiminiń apparaty aqparattandyrý, memlekettik qupıalardy qorǵaý jáne memlekettik qyzmet kórsetý monıtorıńi bóliminiń bas ınspektory – aýdan ákiminiń baspasóz hatshysy D.Aıazbekov BAQ pen áleýimettik jelilerde jarıalanǵan synı materıaldar týraly baıandady.
Aýdan ákimdigi jáne onyń qurylymdyq bólimderi týraly BAQ-ta, áleýmettik jelilerde jarıalanǵan synı materıaldarǵa zerdeleý jumystary júrgizilip, der kezinde aqparattyq anyqtama berilýde. Monıtorıń júrgizý barysynda shilde aıynan beri 24 synı materıal anyqtalyp, olar boıynsha tıisti jumystar júrgizilgen. Synı materıaldardyń basym bóligi aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimine, aýdandyq bilim bólimine jáne aýdandyq veterınarıa bólimine qatysty.
«Jańadan qurylǵan Maqtaaral aýdany ákimdiginiń WhatsApp (87075896785) qyzmeti iske qosylyp, servıske túsken aryz-shaǵymdar men ótinishterge de shuǵyl jaýaptar berilýde. Qazirgi tańǵa deıin turǵyndar tarapynan 12 túrli máseleler qozǵalyp, onyń 11-ne jaýap berilgen» - dedi D.Aıazbekov.
Aıta keteıik, Maqtaaral aýdany boıynsha «Sıfrlyq Qazaqstan» memlekettik baǵdarlamasyn oryndaý úshin aýdan ákimimen jumys jospary bekitilip, birneshe jobalar iske aspaqshy. «Smart Maktaaral» dep atalatyn joba boıynsha aýdandaǵy bazarlar men saýda núkteleriniń, qyzmet kórsetý oryndarynyń jumysyn avtomattandyrý, bilim berý uıymdarynda IT synyptaryn ashý, aýdan boıynsha tegin Wi-fi jelilerin qurý, komýnaldyq tólemderdi termınaldar jáne smartfon arqyly onlaın tóleý, elektrondy aqsha aınalymyna jaǵdaı týǵyzý, aýdannyń mańyzdy joldarynda aqyldy jaryqtandyrý júıelerin ornatý, beınebaqylaý júıelerin damytý, aqyldy sýarý júıelerin engizý sıaqty t.b. jumystar atqarylatyn bolady.
